Вашингтонда 7 сентябрдан 4 октябрга қадар маҳаллий тадбиркорлардан ташкил этилган ўн кишилик гуруҳ «Халқаро таълим бўйича Америка кенгашлари» томонидан АҚШда амалга оширилаётган Uzbekistan Business Leaders (UBL) дастури доирасидаги ўқувда иштирок этди, деб хабар бермоқда «Дунё» ахборот агентлиги.
Қайд этилишича, дастур доирасида иштирокчилар АҚШ компаниялари, нодавлат нотижорат ташкилотлари ва давлат идораларида, Вашингтон, Остин, Техас ва Калифорниянинг Сан-Диего шаҳарларида меҳмонхона бизнеси, IT ва инновациялар, инклюзив таълим, кичик ва ўрта корхоналарни қўллаб-қувватлаш, мебель ишлаб чиқариш каби соҳаларда индивидуал амалиётни ўтаган.
Мамлакатнинг АҚШдаги элчиси Жавлон Ваҳобов АҚШ ҳудудларига ташрифлари ва фуқаролар учун тренинглар якунлари бўйича дастур иштирокчилари билан учрашув ўтказган, унинг доирасида UBL курсини тамомлаганлик сертификатларини топширган.
Тадбиркорларнинг айтишича, ушбу ўқувлар унумли ва жуда фойдали бўлган. Амалиёт АҚШда тадбиркорлик фаолиятининг замонавий методологияларини ўрганиш, билим ва кўникмаларни ошириш, бизнеснинг айрим йўналишлари бўйича амалий тажриба орттириш, ҳамкорликдан манфаатдор америкалик ҳамкорлар билан бевосита алоқаларни ўрнатиш имконини берган.
Маълумот учун, UBL дастури АҚШнинг Ўзбекистондаги элчихонаси томонидан молиялаштирилади ва Халқаро таълим бўйича Америка кенгашлари томонидан бошқарилади. Унга бизнес, тадбиркорлик, ижтимоий тадбиркорлик ва инновациялар билан шуғулланувчи 22 ёшдан 40 ёшгача бўлган мутахассислар жалб этилади. Дастур доирасида иштирокчилар турли тижорат ва нотижорат ташкилотларида, университет бизнес бўлимларида ва тегишли давлат идораларида ихтисослаштирилган профессионал амалиёт ўташ учун АҚШга таклиф этилади. 2018 йили Ўзбекистонда Америка кенгашлари фаолияти тикланганидан сўнг UBL иштирокчиларининг ушбу гуруҳи учинчиси бўлди. Биринчи гуруҳ 2021 йил сентябрда, иккинчиси 2022 йил май ойида бўлиб ўтган.
Изоҳ (0)