Amaliy safar bilan Malayziyaga borgan Buxoro viloyati hokimligi delegatsiyasi Menejment va ilm-fan universiteti (Management and Science University — MSU) hamda “Sunway” universiteti rahbariyati bilan uchrashuvlar o‘tkazdi, deb xabar bermoqda “Dunyo” AA.
O‘zbekiston elchixonasi ko‘magida tashkil etilgan mazkur uchrashuvlarda 2021-yilda Buxoro davlat universiteti bilan imzolangan hamkorlik to‘g‘risidagi memorandumni amaliy amalga oshirish bo‘yicha takliflar muhokama qilindi. Malayziya tomoni O‘zbekistonda oliy ta’lim, fan va zamonaviy kadrlar tayyorlash sohasida amalga oshirilayotgan islohotlarni yuqori baholadi.
Natijada biznes boshqaruvi va turizmni boshqarish yo‘nalishi bo‘yicha ikki tomonlama diplom (O‘zbekistonda 1 yil, Malayziyada 1 yil o‘qish) berish bo‘yicha magistratura ta’lim dasturini ishlab chiqish to‘g‘risida kelishuvga erishildi.
Bundan tashqari, tomonlar 2023-yilda talabalar almashuvi, qo‘shma ilmiy tadqiqotlar olib borish va ikki mamlakat OAVda maqolalar chop etish, shuningdek, MSU rahbariyatining O‘zbekistonga navbatdagi amaliy safarini tashkil etish rejalarini belgilab oldi.
Uchrashuv davomida Buxoro davlat universiteti va Malayziyaning “Sunway” universiteti o‘rtasida hamkorlik to‘g‘risidagi memorandumni imzolash marosimi bo‘lib o‘tdi. Memorandum Malayziya tomonidan “Sunway” universiteti prezidenti Sibrandes Poppema, O‘zbekiston tomonidan BuxDU rektori Obid Hakimov imzoladi.
Hujjat professor-o‘qituvchilar uchun malaka oshirish kurslarini rivojlantirish, talabalar uchun “yozgi maktablar”, “STEM” fanlari bo‘yicha laboratoriyalar tashkil etish bo‘yicha ilg‘or tajriba almashishni nazarda tutadi.
Universitetlar o‘rtasida yuqoridagi loyihalarni ishlab chiqish maqsadida, shuningdek, “Turizm va mehmondo‘stlik”, “Axborot texnologiyalari”, “Biokimyo”, “Sun’iy intellekt” mutaxassisliklari bo‘yicha malakali kadrlar tayyorlash uchun qo‘shma dasturlarni yo‘lga qo‘yish imkoniyatlari va ehtiyojlarini o‘rganish yuzasidan ishchi guruh tuzish to‘g‘risida kelishuvga erishildi.
Mavzuga doir:
Malayziya Buxoroda halol sertifikatlashtirish bo‘yicha mutaxassislar markazi ochadi
Izoh (0)