Амалий сафар билан Малайзияга борган Бухоро вилояти ҳокимлиги делегацияси Менежмент ва илм-фан университети (Management анд Science University — МСУ) ҳамда «Sunway» университети раҳбарияти билан учрашувлар ўтказди, деб хабар бермоқда «Дунё» АА.
Ўзбекистон элчихонаси кўмагида ташкил этилган мазкур учрашувларда 2021 йилда Бухоро давлат университети билан имзоланган ҳамкорлик тўғрисидаги меморандумни амалий амалга ошириш бўйича таклифлар муҳокама қилинди. Малайзия томони Ўзбекистонда олий таълим, фан ва замонавий кадрлар тайёрлаш соҳасида амалга оширилаётган ислоҳотларни юқори баҳолади.
Натижада бизнес бошқаруви ва туризмни бошқариш йўналиши бўйича икки томонлама диплом (Ўзбекистонда 1 йил, Малайзияда 1 йил ўқиш) бериш бўйича магистратура таълим дастурини ишлаб чиқиш тўғрисида келишувга эришилди.
Бундан ташқари, томонлар 2023 йилда талабалар алмашуви, қўшма илмий тадқиқотлар олиб бориш ва икки мамлакат ОАВда мақолалар чоп этиш, шунингдек, МСУ раҳбариятининг Ўзбекистонга навбатдаги амалий сафарини ташкил этиш режаларини белгилаб олди.
Учрашув давомида Бухоро давлат университети ва Малайзиянинг «Sunway» университети ўртасида ҳамкорлик тўғрисидаги меморандумни имзолаш маросими бўлиб ўтди. Меморандум Малайзия томонидан «Sunway» университети президенти Сибрандес Поппема, Ўзбекистон томонидан БухДУ ректори Обид Ҳакимов имзолади.
Ҳужжат профессор-ўқитувчилар учун малака ошириш курсларини ривожлантириш, талабалар учун «ёзги мактаблар», «STEM» фанлари бўйича лабораториялар ташкил этиш бўйича илғор тажриба алмашишни назарда тутади.
Университетлар ўртасида юқоридаги лойиҳаларни ишлаб чиқиш мақсадида, шунингдек, «Туризм ва меҳмондўстлик», «Ахборот технологиялари», «Биокимё», «Сунъий интеллект» мутахассисликлари бўйича малакали кадрлар тайёрлаш учун қўшма дастурларни йўлга қўйиш имкониятлари ва эҳтиёжларини ўрганиш юзасидан ишчи гуруҳ тузиш тўғрисида келишувга эришилди.
Мавзуга доир:
Малайзия Бухорода ҳалол сертификатлаштириш бўйича мутахассислар маркази очади
Изоҳ (0)