Erling Holand APLda Agueroning rekordini takrorladi

“Manchester Siti” hujumchisi Erling Holand Premyer Liga 9-turi doirasida “Sauthempton”ga qarshi kechgan bahsda (4:0) gol urishga muvaffaq bo‘ldi.

Holand APLda ketma-ket yettita o‘yindan beri gol urib kelmoqda. “Manchester Siti” futbolchilaridan faqat Serxio Aguero bu natijaga erisha olgan. Argentinalik sobiq futbolchi 2019-yilning mayidan sentabrga qadar Premyer Liganing 7 ta o‘yinida gol urgan.

Norvegiyalik futbolchi Premyer Liganing ortda qolgan 9 turida 15 ta golga mualliflik qildi. “Manchester Siti”ning o‘tgan mavsumdagi to‘purari Kevin de Bryuyne butun mavsum davomida shuncha to‘p kiritgandi.

Holand barcha musobaqalar doirasida “Manchester Siti” safida 13 ta o‘yin o‘tkazdi va ularda jami 20 marta raqib darvozasini ishg‘ol qildi.

“Shaharliklar” yozda Erlingni 75 million yevro evaziga “Borussiya D”dan sotib olgandi.

Mavzuga doir:

• Erling Holand bonuslar evaziga APL uchun rekord darajadagi maosh olmoqda
• Pep Gvardiola Holand va Messini o‘zaro solishtirdi
• Ronaldu APLda 232 ta o‘yinda erishgan natijani Erling Holand 8 ta uchrashuvda qayd etdi