Putin va harbiylar o‘rtasidagi yopiq uchrashuvdan so‘ng, Rossiya davlat matbuotiga urushdagi muvaffaqiyatsizliklar haqida yozishga ruxsat berildi
Rossiya davlat matbuoti Ukrainaga bostirib kirishning ayrim muvaffaqiyatsizliklarini tan ola boshladi. Bu Vladimir Putinning urush muxbirlari bilan shaxsiy uchrashuvidan bir necha hafta o‘tib sodir bo‘ldi, deb yozadi “Agenstvo Novosti”
Uchrashuv “qisman” safarbarlik e'lon qilinishidan biroz oldin bo‘lib o‘tgan, deb xabar berdi Bloomberg suhbatdoshlari. Unda harbiy qo‘mondonlikdan norozi bo‘lgan urush muxbirlari Putinga frontda sodir bo‘layotgan voqealarning dahshatli manzarasini tasvirlab berdi. Uchrashuvni tark etarkan, ayrim muxbirlar Putin haqiqatan ham Ukrainadagi haqiqiy vaziyat haqida to‘liq tasavvurga ega bo‘lyaptimi, deb hayron bo‘lgan, deydi agentlik manbalari.
Jami yoz boshidan beri harbiy muxbirlar bilan kamida ikkita uchrashuv bo‘lib o‘tdi, deb yozadi Bloomberg. Prezident matbuot kotibi Dmitriy Peskov maqolaga izoh berish haqidagi so‘rovga javob bermadi.
Ma’lumki, Rossiya prezidenti iyun oyida Sankt-Peterburg xalqaro iqtisodiy forumi doirasida harbiy jurnalistlar bilan suhbatlashgan edi. Sentabr oyi boshida Peskov yil oxirigacha davlat rahbari “maxsus operatsiya” jarayonini yorituvchi jurnalistlar bilan navbatdagi uchrashuv o‘tkazishi mumkinligini aytgandi.
Bloomberg manbalarining aytishicha, so‘nggi haftalarda Kreml ba’zi davlat ommaviy axborot vositalariga harbiy muvaffaqiyatsizliklarni tan olishni boshlashni buyurgan, chunki hukumat haddan tashqari ijobiy teledastur odamlarda uning yetarliligiga shubha uyg‘otishidan qo‘rqadi. Shundan so‘ng hukumatparast nashrlarda harbiylarga nisbatan ommaviy tanqidlar paydo bo‘ldi.
Harbiy qo‘mondonlikni jamoatchilik tanqidi Ukraina shaharlari va infratuzilmasiga hujumlarni oqlash uchun ishlatilishi mumkin, deb hisoblaydi siyosatshunos Tatyana Stanovaya. “Hukmron elita o‘rtasida bu urushda qanday g‘alaba qozonish haqida bahs mavjud. Aybdorlarni qidirish ishlari olib borilmoqda va ular Putinni boshqa yechim izlashga majburlamoqda”, — dedi Stanovaya.
Hatto 1-oktabr shanba kuni Liman taslim bo‘lganidan keyin ham Checheniston rahbari Markaziy harbiy okrug generali Aleksandr Lapinni keskin tanqid qilib, uni “o‘rtamiyona” deb atadi. Shu hafta Davlat Dumasi Mudofaa qo‘mitasi rahbari Andrey Kartapolov Mudofaa vazirligini yolg‘on gapirishni bas qilishga chaqirdi. Keyinchalik Davlat Dumasining ikkita qo'mitasi rahbarlari darhol Bosh prokuraturaga Rossiya armiyasini ta’minlash bilan bog'liq vaziyatni o‘rganish iltimosi bilan murojaat qildi.
Mamlakatning asosiy propagandachilari efirda harbiy omadsizliklar haqida gapirishni boshlagan. Olga Skabeeva o‘zining “60 daqiqa” dasturida Rossiya Xerson viloyatidagi o‘ndan ortiq aholi punktlarini yo‘qotgani haqida xabar berdi, Vladimir Solovyov esa o‘zining “Vladimir Solovyov bilan oqshom” ko‘rsatuvida Rossiya jang maydonida unchalik yaxshi ishlamayapti, deb tan oldi. Undan tashqari, RT rahbari Margarita Simonyan Vladimir Putin hatto frontdagi vaziyatdan xabardorligini shubha ostiga oldi.
