«Агробанк»нинг Қашқадарё вилояти бошқармаси масъуллари судьяларни адолатсизликда айбламоқда. Бу ҳақда «Дарё»га банк ҳуқуқшуноси Ойбек Абдурашидов маълумот берди.
Ахборот берилишича, «Агробанк» АТБ Китоб филиали томонидан Жиноят ишлари бўйича Қашқадарё вилоят апелляция инстанцияси судлов ҳайъатига 2022 йил 6 сентябрь куни Жиноят ишлари бўйича Шаҳрисабз шаҳар судининг 2022 йил 2 август кунидаги ҳукмига нисбатан апелляция шикояти ва муддатни тиклаш бўйича ариза билан мурожаат қилинган. Бироқ, жавоб хати вилоятдан эмас, Жиноят ишлари бўйича Шаҳрисабз шаҳар суди томонидан юборилган.
Жиноят ишлари бўйича Шаҳрисабз шаҳар суди шу куннинг ўзида муддатни тиклаш тўғрисидаги ариза рад этилгани ҳақида жавоб хати тайёрлаб, атайин кечиктириб, «Агробанк»АТБнинг Китоб филиалига юборган. Жавоб хати банкнинг Китоб филиалига 2022 йил 13 сентябрь кунида келиб тушган. Жавоб хатида «ЖИБ Шаҳрисабз шаҳар суди раиси номига ёзган аризангиз ўрганиб чиқилди», дейилган. Аслида, банкнинг Китоб филиали томонидан ЖИБ Шаҳрисабз шаҳар суди раиси номига эмас балки, Жиноят ишлари бўйича Қашқадарё вилоят апелляция инстанцияси судлов ҳайъатига ариза билан мурожаат қилинган, — дейди банк юристи Ойбек Абдурашидов.Юристнинг тушунтиришича, амалдаги қонун талабларига кўра, фуқаровий даъвогар «Агробанк» АТБ Китоб филиали томонидан апелляция шикояти бериш муддатлари ўтказилмаган.
Ҳукмнинг санкция қисмида фуқаровий даъвогар ҳукмни олган кундан эътиборан 20 кун муддат ичида апелляция шикояти бериш ҳуқуқига эга эканлиги кўрсатиб ўтилган. Шу ҳолатда, яъни филиал ҳукмни 2022 йил 26 август куни олганлигини инобатга олсак, 10 кунлик муддат ичида апелляция шикоятини берган ҳисобланади. Агарда апелляция шикояти муддати ўтган деб ҳисобланса, яъни ҳукм фуқаровий даъвогарга келиб тушган кунгача 20 кунлик муддат ўтган деб ҳисобланмайди, — дейди у.Маълум қилинишича, мазкур жиноят ишининг суд муҳокамасида суд раиси судланувчига унинг айблов қарорига қўйилган 158 миллион 935 минг сўм зарарни суд муҳокамаси давомида тўласа, гаров сифатида қўйилган мулкини тақиқдан чиқариш тўғрисида қарор қабул қилишини айтган. Бироқ, дастлабки тергов давомида терговчи томонидан етказилган зарар деб фақатгина кредитнинг асосий суммаси инобатга олинган. Ушбу кредитга ҳисобланган фоиз ва пеня тўловлари инобатга олинмаган.
Судда судья етказилган зарар миқдори ва ўша пайтда банк филиалидан ЯТТ «Назаров Шаҳзод Эркин ўғли»нинг қарздорлиги тўғрисидаги маълумотни талаб қилмаган. Ва банкка етказилган зарар тўлиқ сўндирилмасдан эҳтиёт чораси сифатида қўлланилган қамоқ бекор қилинган, — дейди юрист.Аниқлаштирилишича, ЯТТ «Назаров Шаҳзод Эркин ўғли»га ажратилган кредит бўйича жами 233 миллион 410 минг сўм қарздорлик мавжуд бўлган.
Жиноят ишлари бўйича Шаҳрисабз шаҳар судининг 2022 йил 2 август куни чиқарилган ҳукмига кўра, «ЯТТ Назаров Шаҳзод Эркин ўғли» томонидан депозит ҳисоб рақамига 158 миллион 935 минг сўм тўланган ва ушбу маблағ «Агробанк» АТБ Китоб филиали ҳисоб рақамига ўтказилган. 233 миллион 410 минг сўмнинг 158 миллион 935 минг сўми тўланган бўлса-да, 74 миллион 475 минг сўмлик қарздорлик ёпилмай қолган. Судья шуни инобатга олмаган ва банк манфаатларига зид равишда қарор қабул қилган, — дейди банк ҳуқуқшуноси.«Дарё» банк масъуллари келтирган маълумотларни Қашқадарё вилоят судига тақдим қилиб, ҳолатга изоҳ сўраганда суд ахборот хизмати банкнинг апелляция шикояти расмийлаштирилаётганини маълум қилди.
«Агробанк» АТБ Китоб филиали бошқарувчисининг 2022 йил 6 сентябрдаги аризасида Жиноят ишлари бўйича Шаҳрисабз шаҳар судининг 2022 йил 2 август кунидаги Ш.Назаровга нисбатан чиқарилган ҳукмининг гаров таъминоти сифатида қўйилган Китоб туманида жойлашган Х.Усмоновага тегишли «Савдо дўкони ва нон маҳсулотлари ишлаб чиқариш цехи» биносига қўйилган тақиқни бекор қилиш қисмидан норози бўлиб, апелляция шикояти бериш муддатини тиклаб бериш сўралган. ЖИБ Шаҳрисабз шаҳар суди томонидан 2022 йил 6 сентябрь куни Жиноят процессуал кодексининг 497-4-моддаси (ҳукм устидан апелляция шикоятлари ва протестлари бериш муддати) талабидан келиб чиқиб, апелляция тартибида берилган шикояти бўйича шикоят бериш муддатидан ўтказиб берилгани, муддатни тиклаш учун узрли сабаб бўладиган асослар келтирилмаганлиги сабабли шикоят рад этилган.«Дарё» воқеалар ривожини кузатишда давом этади.«Агробанк» АТБ Китоб филиали бошқарувчисининг 2022 йил 3 октябрдаги апелляция шикояти бериш муддатини тиклаб бериш ҳақидаги илтимосномаси Жиноят ишлари бўйича Шаҳрисабз шаҳар суди томонидан кўриб чиқилиб, шикоят бериш муддатини тиклаш учун етарли асослар келтирилганлиги сабабли илтимоснома қаноатлантирилиб, ҳозирда апелляция шикояти расмийлаштирилмоқда, — дейилади вилоят суди ахборот хизмати маълумотида.
Изоҳ (0)