Polsha Tashqi ishlar vazirligi Rossiya elchisi Sergey Andreyevni mahalliy vaqt bilan 11:00 (Toshkent vaqti bilan 14:00)ga chaqirdi, bu haqda vazir o‘rinbosari Marchin Pshidach ma’lum qildi.
Uning so‘zlariga ko‘ra, ayni paytda Moskva va Varshava munosabatlari “asosan muzlatib qo‘yilgan”.
“Hech qanday diplomatik aloqalar yo‘q, men yoki vazirning elchi Andreyev bilan uchrashuvlarini hisobga olmaganda, va bugun ana shunday uchrashuv o‘tkaziladi”, — dedi u.
Pshidachning aniqlik kiritishicha, elchining chaqirilishiga “Rossiyaning so‘nggi hafta ichidagi xatti-harakatlari”, aniqrog‘i, DXR, LXR, Xerson va Zaporojye viloyatlaridagi referendumlar hamda keyinroq ularning qo‘shib olinishi sabab bo‘lgan.
Avvalroq Polsha TIV ushbu hududlarda referendumlar o‘tkazilganini ham, ularning Rossiya tarkibiga qo‘shib olinishini ham qoralab bayonotlar bilan chiqqan edi.
Ukraina Rossiya xatti-harakatlariga javoban, NATOga qo‘shilish uchun tezlashtirilgan rejimda ariza berishini e’lon qildi. Alyans 30 ta a’zo mamlakatning barchasi rozilik berganidan keyingina yangi a’zoni qabul qilishini bildirdi.
Polsha Ukrainaning NATOga qo‘shilishini qo‘llab-quvvatlab chiqqan to‘qqizta a’zo mamlakatdan biri bo‘ldi. Polsha, Chexiya, Estoniya, Latviya, Litva, Shimoliy Makedoniya, Chernogoriya, Ruminiya va Slovakiya prezidentlarining qo‘shma bayonoti Polsha yetakchisi Anjey Dudaning saytiga joylandi.
Avvalroq Germaniya, Buyuk Britaniya, Latviya, Shvetsiya, Daniya va Italiyada ham Rossiya elchilari TIVga chaqirilgandi.
Izoh (0)