Rossiya Federatsiyasi hududida bo‘lib turish uchun asoslarga ega bo‘lmagan chet el fuqarolari 2022-yil 12-oktabrga qadar mamlakatdan chiqib ketishi yoki o‘z huquqiy holatini rasman tartibga solishi kerak, deya xabar bermoqda Rossiya OAVlari.
Xususan, bu haqda jurnalistlarga Rossiya IIVning Sverdlov viloyati bosh boshqarmasi matbuot xizmati rahbari Valeriy Gorelix ma’lum qilgan.
Uning aytishicha, bu Rossiya prezidenti va hukumati tomonidan imzolangan tegishli hujjatlar nizomlarini ijro etish doirasida amalga oshirilishi kerak.
Uning so‘zlariga ko‘ra, ichki ishlar organlari migratsiya hisobini uzaytirmagan chet el fuqarolarining mamlakatdan o‘z vaqtida chiqib ketishi ustidan nazorat olib boradi.
“Politsiya xodimlari, qonunbuzarlar aniqlangan taqdirda, ularni amaldagi qonunchilikda ko‘zda tutilgan javobgarlikka tortish choralarini ko‘radi”, — dedi Gorelix.
U Markaziy Ural mehmonlarini shartli nomi “Nelegal” bo‘lgan aksiya doirasidagi rejali profilaktika tadbirlari chog‘ida xavotirlanishga o‘rin bo‘lmasligi uchun o‘z hujjatlarini vaqtida tartibga solishga chaqirdi.
Bunday ogohlantirish Rossiyaning boshqa hududlaridagi noqonuniy muhojirlar uchun e’lon qilingan.
Eslatib o‘tamiz, 20-sentabr kuni Rossiya Davlat dumasi yangi qonun qabul qildi, unga muvofiq, armiyada bor-yo‘g‘i bir yil xizmat qilganlar ushbu mamlakat fuqaroligini qo‘lga kiritishi mumkin bo‘ladi.
Shundan keyin O‘zbekiston Bosh prokuraturasi xorijdagi o‘zbekistonliklarga murojaat qilib, ularni chet davlatlar harbiylashgan tuzilmalariga yollanish javobgarlikka sabab bo‘lishidan ogohlantirgandi. Shuningdek, O‘zbekistonning Rossiyadagi elchixonasi fuqarolarni harbiy harakatlarda ishtirok etmaslikka chaqirdi.
Mavzuga doir:
- Rossiyada bo‘lish tartib-qoidalarini buzgan 46 nafar o‘zbekistonlik vaqtinchalik saqlash markaziga joylashtirilgan
- Migratsiya agentligi Rossiyadagi o‘zbekistonliklarga murojaat bilan chiqdi
- Rossiya Qurolli kuchlarida xizmat qilish uchun yillik shartnoma tuzgan migrantlarga soddalashtirilgan tartibda fuqarolik beriladi
Izoh (0)