Farg‘ona jamoat salomatligi tibbiyot institutining yangi o‘quv binosi foydalanishga topshirildi. Bu haqda “Daryo” muxbiri Azizjon Ermatov xabar berdi.
Shu munosabat bilan o‘tkazilgan tantanali tadbirda viloyat hokimi Xayrullo Bozorov, Sog‘liqni saqlash vaziri Behzod Musayev, respublikadagi tibbiyot oliygohlari rektorlari va talabalar ishtirok etgan.
Qayd etilishicha, 30 milliard so‘m mablag‘ evaziga institutning yangi o‘quv binosi qurilgan hamda zarur vositalar bilan jihozlangan.
Institut zamonaviy jihozlar bilan ta’minlangan 3 ta o‘quv binosi, simulyatsiya markazi, vivariy, ilmiy laboratoriya, 500 o‘rinli anjumanlar zali, 200 o‘rinli oshxonaga ega bo‘lgan.
Institut dastlab Toshkent tibbiyot akademiyasi Farg‘ona filiali sifatida faoliyat boshlagan. 2020-yil dekabr oyida Farg‘ona jamoat salomatligi tibbiyot institutiga mustaqil maqom berilgan.
Hozirda Farg‘ona jamoat salomatligi tibbiyot institutida 3 ming 100 nafardan ziyod talaba ta’lim olmoqda.
Tadbirda o‘qituvchi va murabbiylar kuni munosabati bilan institutning bir guruh faxriy ustozlariga “Sog‘liqni saqlash a’lochisi” ko‘krak nishoni topshirilgan.
Izoh (0)