O‘zbekistondagi Islom sivilizatsiya markazi direktori Shoazim Minovarov boshchiligidagi delegatsiya Dohaga tashrifi doirasida Qatar Islom san’ati muzeyi direktori o‘rinbosari Shayxa Nosir an-Nosir va Hamad bin Xalifa universiteti Islom tadqiqotlar fakulteti dekani Rajab Shenturk bilan muzokaralar o‘tkazdi. Bu haqda “Dunyo” axborot agentligi xabar qilmoqda.
Qayd etilishicha, uchrashuvda Qatar Islom san’ati muzeyi rahbariyati bilan hamkorlikni yo‘lga qo‘yish maqsadida anglashuv memorandumini imzolash, qo‘lyozmalarni ta’mirlash va raqamlashtirish, tomonlarda mavjud bo‘lgan nodir qo‘lyozma va asarlar nusxalarini almashish, qo‘shma ilmiy anjumanlar o‘tkazishga kelishib olingan.
Shuningdek, o‘zbek mutaxassislari ishtirokida hamkorlikda Dohadagi muzey qoshidagi ta’lim markazida xattotlik, ganch o‘ymakorligi va xalq hunarmandchiligining boshqa yo‘nalishlarida mahorat darslari o‘tkazish bo‘yicha ham kelishuvga erishilgan.
Tomonlar o‘zaro hamkorlikni rivojlantirish, xususan, qo‘shma ilmiy-amaliy anjumanlar, seminarlar, tadqiqotlar, o‘quv kurslari tashkil etish, o‘zaro malaka almashish va professor-o‘qituvchilar hamda talabalar almashuvini yo‘lga qo‘yish, mutaxassislar tashriflarini amalga oshirishga kelishib olgan.
Bundan tashqari, Islom tadqiqotlar fakulteti Qatar xayriya tashkiloti bilan hamkorlikda ITSM va O‘zbekistondagi tegishli o‘quv yurtlari hamda markazlarga ularning ehtiyojlaridan kelib chiqib, 30 mingdan ortiq turli adabiyotlar, o‘quv qo‘llanmalari, darsliklar va boshqa turdagi kitoblarni yetkazib berish imkoniyati borligini bildirgan.
Rajab Shenturk har yili “Islom moliyasi” yo‘nalishida Dohada o‘tkaziladigan xalqaro anjuman to‘g‘risida ma’lumot berib, mazkur tadbir ishiga O‘zbekiston vakillarini taklif qilgan.
Izoh (0)