Britaniyaning yangi bosh vaziri Liz Trass hukumati 2030-yilga borib mudofaa budjetini ikki baravarga ya’ni 100 milliard funt sterlingga (108,45 milliard dollar) yetkazmoqchi. Bu haqda Buyuk Britaniya mudofaa vaziri Ben Uolles The Telegraph nashriga bergan intervyusida ma’lum qildi.
“Agar qandaydir o‘zgarishlar bo‘lmasa, biz 2 foizga (YIMdagi mudofaa xarajatlari) qarab ketmoqdamiz. Gap 2029—2030 yillarga qadar 100 milliard funt sterling miqdoridagi mudofaa budjeti haqida ketmoqda. Hozir bu 48 milliard funt sterlingni tashkil etadi”, — dedi Mudofaa vazirligi rahbari.
Uolles qo‘shimcha mablag‘lar qayerga yo‘naltirilishi haqida aniq ma’lumot bermadi, biroq vazirlik axborot ma’lumotlarini yig‘ish, kuzatuv va razvedka imkoniyatlarini hamda dronlarga qarshi kurash qobiliyatini kuchaytirishni rejalashtirayotganini aytdi. “Agar shu kichik dronlarni ham urib tushira olmasak, biz juda zaifmiz”, — dedi u.
Shu hafta Britaniya bosh vaziri idorasi yil oxirigacha hukumat keng qamrovli xavfsizlik, mudofaa va tashqi siyosat sharhining yangilangan versiyasini nashr etishini e’lon qildi. London yangi doktrinada Rossiya va Xitoydan kelayotgan tahdidlarga qarshi kurashishga e’tibor qaratishini va’da qilmoqda.
Izoh (0)