Lionel Messi terma jamoalar tarixida eng yaxshi to‘purarlar ro‘yxatida 3-o‘ringa ko‘tarilishi uchun bitta gol qoldi

Argentina hujumchisi Lionel Messi Gondurasga qarshi o‘rtoqlik o‘yinida (3:0) dubl qayd etdi.

35 yoshli hujumchi terma jamoadagi 163-o‘yinida 88-golini urdi. Messi allaqachon Argentina tarixidagi eng yaxshi to‘purarga aylangan. Avvalgi rekord Gabriel Batistutaga tegishli edi (77 o‘yinda 54 ta gol).

Lionel terma jamoalar tarixidagi eng yaxshi to‘purarlar ro‘yxatida 4-o‘rinni egallab turibdi. Uchinchi o‘rinni Malayziya terma jamoasi a’zosi Mohtar Dahari 142 o‘yinda 89 ta gol bilan egallab turibdi. Argentinalik 3-o‘ringa ko‘tarilib olishi uchun bitta gol kifoya.

Ikkinchi o‘rinda Ali Dayi (Eron, 148 o‘yinda 109 ta gol) joylashgan. Terma jamoalar tarixida eng ko‘p gol urish bo‘yicha rekordchi Krishtianu Ronaldu hisoblanadi. Portugaliyalik 189 o‘yinda 117 ta gol muallifiga aylangan.