Harbiy xizmatdan bosh tortganlik uchun 10 yilgacha qamoq: Putin safarbarlik yuzasidan qonun imzoladi

Rossiya prezidenti Vladimir Putin Jinoyat kodeksiga harbiy xizmatga oid o‘zgartirishlar kiritish yuzasidan qonunni imzoladi.

Xususan, unda quyidagilar aks etgan:

• ixtiyoriy taslim bo‘lganlik uchun 10 yilgacha ozodlikdan mahrum qilish;
• harbiy harakatlarda qatnashishdan bosh tortganlik uchun 10 yilgacha ozodlikdan mahrum qilish;
• dezertirlik va xizmatga kelmaganlik uchun 10 yilgacha ozodlikdan mahrum qilish.

Shuningdek, harbiy buyruqlarni bajarmaslik, harbiy xizmat boshlig‘iga qarshilik ko‘rsatish, xizmat joyini o‘zboshimchalik bilan tark etish, xizmatdan bo‘yin tovlash, xizmat o‘tash qoidalarini buzganlik uchun javobgarlik kuchaytirilmoqda.

Ba’zi o‘zgartirishlar davlat buyurtmasi bo‘yicha shartnomalarni bajarmaslik bilan bog‘liq — shartnoma shartlarini takroran buzganlik uchun to‘rt yildan sakkiz yilgacha qamoq jazosi mavjud.

Harbiy xizmatga qarshi jinoyatlar nafaqat qurolli mojaro yoki jangovar harakatlar sharoitida, balki “safarbarlik yoki harbiy holat davrida, urush davrida” ham sodir etilgan bo‘lsa, jazoni og‘irlashtiruvchi holat deb hisoblanadi.