Ҳарбий хизматдан бош тортганлик учун 10 йилгача қамоқ: Путин сафарбарлик юзасидан қонун имзолади

Россия президенти Владимир Путин Жиноят кодексига ҳарбий хизматга оид ўзгартиришлар киритиш юзасидан қонунни имзолади.

Хусусан, унда қуйидагилар акс этган:

• ихтиёрий таслим бўлганлик учун 10 йилгача озодликдан маҳрум қилиш;
• ҳарбий ҳаракатларда қатнашишдан бош тортганлик учун 10 йилгача озодликдан маҳрум қилиш;
• дезертирлик ва хизматга келмаганлик учун 10 йилгача озодликдан маҳрум қилиш.

Шунингдек, ҳарбий буйруқларни бажармаслик, ҳарбий хизмат бошлиғига қаршилик кўрсатиш, хизмат жойини ўзбошимчалик билан тарк этиш, хизматдан бўйин товлаш, хизмат ўташ қоидаларини бузганлик учун жавобгарлик кучайтирилмоқда.

Баъзи ўзгартиришлар давлат буюртмаси бўйича шартномаларни бажармаслик билан боғлиқ — шартнома шартларини такроран бузганлик учун тўрт йилдан саккиз йилгача қамоқ жазоси мавжуд.

Ҳарбий хизматга қарши жиноятлар нафақат қуролли можаро ёки жанговар ҳаракатлар шароитида, балки «сафарбарлик ёки ҳарбий ҳолат даврида, уруш даврида» ҳам содир этилган бўлса, жазони оғирлаштирувчи ҳолат деб ҳисобланади.