Никоҳсиз туғилган фарзанд тамғаси ва бой берилган болалик: Болливуд юлдузи Рекҳа кинодаги карьерасини қандай бошлаган?

Болливуднинг афсонавий актрисаларидан бири Рекҳанинг карьераси қай йўсинда бошланган? Томошабинлар у ҳақда қандай фикрда бўлган? Bollywoodtime нашри ушбу саволларга жавоб беради.

Рекҳа Тамил саноатининг икки юлдузи Жемини Ганешан ва Пушпавалли ўртасидаги муҳаббат меваси эди. Унинг отаси ўзини актёрликда синаб кўришга қарор қилган оилали бадавлат одам эди. Онаси эса етакчи актриса ва миш-мишларга кўра, у ишлайдиган студия эгасининг севгилиси эди. Жемини ва Пушпавалли бир фильмда бирга рол ўйнади ва актрисанинг оз бўлса-да машҳурлиги Рекҳанинг отасига карьера учун кўмак бўлди.

Кўп ўтмай ҳамкасблар бир-бирини севиб қолди. Студия эгаси Пушпаваллига шарт қўйди: ё оилали эркак билан муносабатларни тугатади ёки у кинодаги фаолиятини якунлайди. Пушпавалли қалбига қулоқ солди ва муҳаббатни танлади. Натижада ҳеч нарсага эриша олмай, студияни тарк этди. Орадан 5 йил ўтиб, унинг оилали севгилиси Болливуд кўрган энг катта кино юлдузларидан бирига айланди. Аммо Пушпавалли икки қизи билан карьерасиз ёлғиз қолди.

Собиқ актриса бадавлат ва машҳур ота томонидан унутилган болалари билан қашшоқлик ёқасида кун кечирарди. Афсуски, Рекҳа никоҳсиз туғилган фарзанд эди. Рекҳа оилада ўртанча фарзанд бўлиб, у ва унинг опаси Радҳанинг ҳам отаси Жемини Ганешан. Сўнгра камбағал оилада яна бир ноқонуний бола дунёга келди. Ҳеч бир боласи учун Пушпавллига алимент тўланмагани туфайли ҳам улар аранг ҳаёт кечирарди.

Рекҳа ҳамма қийинчиликлардан ташқари, жуда машҳур отанинг қизи бўлишнинг масъулиятига ҳам эга эди. Бўлажак актрисанинг синфдошлари ва дўстлари унинг ҳикоясини ундан ҳам яхшироқ биларди. Мактабда уни ҳақоратлашар, Рекҳа эса уларнинг масхараларига жавоб бермаслик учун «терисини қалин» қилиши керак эди.

Рекҳа улғайиб, фильмларда суратга туша бошлаганида, унинг ҳақиқий истеъдод эгаси экани намоён бўлди. Болливуд кино продюсери унга шартнома имзолаш учун катта пул таклиф қилганидан сўнг она жуда ёш қизини ёлғиз Бомбейга ишлаш ва бутун оилани боқиш учун юборишдан тортинмади. Бундай вазиятда Рекҳа таклифни рад этиб, муваффақиятсизликка бўйин эгса, 5 киши очликдан ўлиши тайин эди.

14 яшар Рекҳанинг ёнида на оиласи, на бошқа яқини бор эди. Режиссёр дарров бўса олиш саҳнаси фильм учун яхши реклама бўлади, деб қарор қилди. Оммавий ахборот воситаларида ёш Рекҳа беҳаёликнинг тимсоли сифатида тилга олинди. Фильмдаги муҳаббат ҳақиқийлиги ва уни тараннум этувчи бошқа саҳналар актрисанинг ўзига ҳам ёқиб тушганлиги ҳақида ёзишди. Шу тарзда актриса турли хил танқидлар ичига кўмилиб кетди. Рекҳа ўша йилларнинг томошабинлари тасаввурида енгилтак актриса сифатида намоён бўлди.

Болливудда ўтган асрнинг 70 йилларнинг бошлари машҳурлар ҳақидаги даҳшатли мақолалари даври эди. Йирик нашрлар кўпинча интервью уюштириб, уларнинг обрўсини янада оширар эди. Рекҳанинг суратга олиш майдончасидаги хатти-ҳаракатлари ҳам журнал саҳифаларини тўлдирди.

Рекҳага нисбатан бўлган шов-шувлардан кейин у икки маротаба жиддий муносабатга киришди. Аввал Житендра, кейин эса Винод Меҳра билан. Айтишларича, у Винод билан шаръий никоҳда бўлган, лекин расмий равишда турмуш қурмаган. Виноднинг онаси эса уларнинг бирга бўлишига рухсат бермаган.

Бундан ташқари, карьерасининг бошида Рекҳа бу касбга жиддий қарашдан бош тортди. У ўзини мактаб ўқувчиси каби тутди, дарсларни қолдирди, парҳез, бўяниш, костюмлардан нафратланди. У имкон қадар камроқ ишлашни, суратга тушишни ўтказиб юборишни хоҳларди, бунинг ўрнига дўконларда айланишга ва ҳаётдан завқланишга вақт сарфларди.

Шундай қилиб бу Рекҳанинг Болливуд оламига кириб келиши эди. У оммавий ахборот воситалари бонг урганидек енгилтак актриса сингари тузоққа тушишига бир бахя қолди. Албатта, бундай актрисалар бир лаҳзада йўқ бўлиб кетади ёки иккинчи даражали ролларни ўйнайди.

Тез орада у ўзини, қиёфасини ва ишга муносабатини бутунлай ўзгартирди. Унинг ҳаётига Болливвуд қироли Амитабҳ Баччан ҳам кириб келди. Бу актрисанинг карьераси гуллаб-яшнаган вақтга тўғри келди. Машҳур актрисани янги саҳифа ва саргузаштлар карьерасининг навбатдаги босқичида кутиб турар эди.