Germaniya kansleri Olaf Shols Birlashgan Millatlar Tashkiloti Bosh assambleyasining 77-sessiyasida so‘zlagan nutqida Berlinga BMT Xavfsizlik kengashi a’zoligidan joy berishni so‘radi.
“Germaniya katta mas’uliyatni o‘z zimmasiga olishga tayyor — birinchi navbatda 2027 va 2028- yillardagi o‘nta o‘zgaruvchan a’zodan biri sifatida, kelajakda esa doimiy a’zo sifatida”, — dedi u hamda Germaniyaning nomzodini qo‘llab-quvvatlashga chaqirdi.
Shu bilan birga, Shols Xavfsizlik kengashini isloh qilishga chaqirdi. “Biz qoidalar va institutlarimizni XXI asr haqiqatiga moslashtirishimiz kerak. Ular ko‘proq 30, 50 yoki 70 yil oldingi dunyoga mos kelmoqda. Bu BMT Xavfsizlik kengashiga ham taalluqlidir”, — dedi u Osiyo, Afrika va Janubiy Amerika mamlakatlari jahon sahnasida ko‘proq siyosiy ta’sirga ega bo‘lishi kerakligini nazarda tutib.
Fransiya prezidenti Emmanuel Makron Bosh assambleyadagi nutqida BMT Xavfsizlik kengashining doimiy a’zolari sonini oshirishga chaqirgan edi. Uning fikricha, ayni paytda “ommaviy jinoyatlarga nisbatan veto huquqini cheklash kerak”.
BMT Xavfsizlik kengashining hozir beshta doimiy a’zosi bor — Rossiya, Buyuk Britaniya, Xitoy, AQSH va Fransiya. Bu mamlakatlarning har biri kengashda veto huquqiga ega. Har ikki yilda geografik asosda saylanadigan kengashning yana o‘n nafar a’zosi doimiy bo‘lmagan a’zolar maqomiga ega. Germaniya har sakkiz yilda bir a’zolik uchun ariza beradi.
Izoh (0)