Германия канцлери Олаф Шольц Бирлашган Миллатлар Ташкилоти Бош ассамблеясининг 77-сессиясида сўзлаган нутқида Берлинга БМТ Хавфсизлик кенгаши аъзолигидан жой беришни сўради.
«Германия катта масъулиятни ўз зиммасига олишга тайёр — биринчи навбатда 2027 ва 2028- йиллардаги ўнта ўзгарувчан аъзодан бири сифатида, келажакда эса доимий аъзо сифатида», — деди у ҳамда Германиянинг номзодини қўллаб-қувватлашга чақирди.
Шу билан бирга, Шольц Хавфсизлик кенгашини ислоҳ қилишга чақирди. «Биз қоидалар ва институтларимизни XXI аср ҳақиқатига мослаштиришимиз керак. Улар кўпроқ 30, 50 ёки 70 йил олдинги дунёга мос келмоқда. Бу БМТ Хавфсизлик кенгашига ҳам тааллуқлидир», — деди у Осиё, Африка ва Жанубий Америка мамлакатлари жаҳон саҳнасида кўпроқ сиёсий таъсирга эга бўлиши кераклигини назарда тутиб.
Франция президенти Эммануэль Макрон Бош ассамблеядаги нутқида БМТ Хавфсизлик кенгашининг доимий аъзолари сонини оширишга чақирган эди. Унинг фикрича, айни пайтда «оммавий жиноятларга нисбатан вето ҳуқуқини чеклаш керак».
БМТ Хавфсизлик кенгашининг ҳозир бешта доимий аъзоси бор — Россия, Буюк Британия, Хитой, АҚШ ва Франция. Бу мамлакатларнинг ҳар бири кенгашда вето ҳуқуқига эга. Ҳар икки йилда географик асосда сайланадиган кенгашнинг яна ўн нафар аъзоси доимий бўлмаган аъзолар мақомига эга. Германия ҳар саккиз йилда бир аъзолик учун ариза беради.
Изоҳ (0)