Taniqli rossiyalik teleboshlovchi va jurnalist Vladimir Pozner koronavirus bilan kasalxonaga yotqizilgani haqidagi ma’lumotlarni rad etdi. Bu haqda “TASS” xabar bermoqda.
“Bularning barchasi mutlaqo yolg‘on va qandaydir tushunarsiz”, — deydi Pozner. Shuningdek, u jurnalistlarga havotir va hayajonli xabarlar uchun minnatdorchilik ham bildirgan.
Avvalroq Poznerning koronavirus bilan kasalxonaga yotqizilgani haqida 16-sentabr kuni Mash Telegram’da xabar bergan edi.
Nashrning yozishicha, teleboshlovchida birinchi alomatlar – haroratning 37,2 ga ko‘tarilishi, yo‘tal, bosh og‘rig‘i va umumiy holsizlik bilan kechgan.
Unda bu alomatlar 15-sentabr kuni kechqurun paydo bo‘lgan va ahvoli yomonlashgach u tez yordam chaqirgan. Shuningdek, shifokorlar jurnalistning ahvolini o‘rtacha og‘ir deb baholagani aytilgan.
Bu yil televideniye afsonasi 88 yoshga to‘ldi. Bungacha u koronavirus bilan mutlaqo kasallanmagan.
Ma’lumot uchun: Vladimir Pozner sovet, rus va amerikalik jurnalist. Radio va teleboshlovchisi, yozuvchi. U, shuningdek, Rossiya televideniyesi akademiyasi fondining birinchi prezidenti. 2008-yildan beri Rossiyaning “Birinchi kanali”da muallif o‘zining “Pozner” televizion intervyu dasturini olib boradi.
Izoh (0)