AQSHning Forbes nashri Shavkat Mirziyoyevning Samarqandda bo‘lib o‘tgan Shanxay hamkorlik tashkiloti sammitiga bag‘ishlangan dasturiy maqolasiga e’tibor qaratib, G‘arb uchun SHHT sammiti qanday ahamiyatga ega ekani haqida tahliliy materialni e’lon qildi.
“Davlat rahbari xalqaro vaziyatga oid qarashlari haqida gapirar ekan, global xavf-xatar kabi masalalarga ham to‘xtalib o‘tdi. Mirziyoyev iqlim o‘zgarishi va pandemiya bilan bog‘liq xavotirlarni tilga olib, bularning barchasi o‘sishga to‘sqinlik qilishi mumkinligini bildirdi. Bu, ayniqsa, O‘zbekiston kabi rivojlanayotgan mamlakatlarga taalluqlidir.
SHHTning iqtisodiy yo‘nalishiga ham alohida e’tibor qaratildi. “SHHT Yevroosiyodagi eng yirik iqtisodiy hamkorlik institutidir. U o‘z a’zolari uchun ushbu sohadagi hamkorlikni rag‘batlantiradi, shuningdek, ularni yirik bozorlar — AQSH va Yevropa bilan bog‘laydi.
Tashkilotni rivojlantirishga qaratilgan yirik loyihalar temir yo‘llardir. Ular ko‘pincha Xitoy va oxir-oqibat Markaziy Osiyo tovarlarini Yevropaga olib kirish yo‘li sifatida ko‘riladi. Bu logistika investitsiyalari faqatgina G‘arb iste’molchilari uchun resurs va ishlab chiqarish markazi maqomini saqlab qolish uchun emas, balki mintaqaning o‘zini rivojlantirishga ham qaratilgan. Yirik loyihalardan biri O‘zbekistonni Afg‘oniston orqali Pokiston bilan bog‘laydigan Transafg‘on temir yo‘lidir.
Osiyo va Yevropa o‘rtasidagi savdo uchun muqobil transport yo‘nalishlarini yaratishi kerak. SHHTning boshqa transport infratuzilma loyihalari orasida Xitoy–Markaziy Osiyo gaz quvuri, Xitoy–Qozog‘iston–O‘zbekiston va Xitoy–Qirg‘iziston temiryo‘llari, shuningdek, Xitoy–Qirg‘iziston–O‘zbekiston avtomobil yo‘li mavjud”, — deyiladi maqola.
Material muallifi Rossiyaga nisbatan joriy etilgan sanksiyalar tufayli hozirda Rossiya va Belarusdan bu yerga ko‘chib kelayotgan rossiyalik IT-mutaxassislar oqimi kuzatilayotganini inobatga olib, yangi voqelikda O‘zbekistonning texnologik rivojlanish istiqbollariga to‘xtaldi.
Maqola O‘zbekiston prezidentining “Xalqaro va mintaqaviy tashkilotlar mamlakatlar o‘rtasidagi turli kelishmovchiliklarni yengib o‘tish, o‘zaro anglashuvni mustahkamlash, siyosiy va iqtisodiy hamkorlikni rivojlantirish, savdo-sotiqni kengaytirish hamda madaniy-gumanitar almashinuvni rag‘batlantirishga yordam beradi”, degan iqtibos bilan yakunlandi.
Shu bilan birga, muallif O‘zbekistonning o‘zida 2022-yilda yalpi ichki mahsulotning 3,4 foizga o‘sishi kutilayotganiga e’tibor qaratadi, bu esa Xalqaro valyuta jamg‘armasi Xitoy uchun taxmin qilgani bilan bir xil hisoblanadi.
Izoh (0)