АҚШнинг Forbes нашри Шавкат Мирзиёевнинг Самарқандда бўлиб ўтган Шанхай ҳамкорлик ташкилоти саммитига бағишланган дастурий мақоласига эътибор қаратиб, Ғарб учун ШҲТ саммити қандай аҳамиятга эга экани ҳақида таҳлилий материални эълон қилди.
«Давлат раҳбари халқаро вазиятга оид қарашлари ҳақида гапирар экан, глобал хавф-хатар каби масалаларга ҳам тўхталиб ўтди. Мирзиёев иқлим ўзгариши ва пандемия билан боғлиқ хавотирларни тилга олиб, буларнинг барчаси ўсишга тўсқинлик қилиши мумкинлигини билдирди. Бу, айниқса, Ўзбекистон каби ривожланаётган мамлакатларга тааллуқлидир.
ШҲТнинг иқтисодий йўналишига ҳам алоҳида эътибор қаратилди. «ШҲТ Евроосиёдаги энг йирик иқтисодий ҳамкорлик институтидир. У ўз аъзолари учун ушбу соҳадаги ҳамкорликни рағбатлантиради, шунингдек, уларни йирик бозорлар — АҚШ ва Европа билан боғлайди.
Ташкилотни ривожлантиришга қаратилган йирик лойиҳалар темир йўллардир. Улар кўпинча Хитой ва охир-оқибат Марказий Осиё товарларини Европага олиб кириш йўли сифатида кўрилади. Бу логистика инвестициялари фақатгина Ғарб истеъмолчилари учун ресурс ва ишлаб чиқариш маркази мақомини сақлаб қолиш учун эмас, балки минтақанинг ўзини ривожлантиришга ҳам қаратилган. Йирик лойиҳалардан бири Ўзбекистонни Афғонистон орқали Покистон билан боғлайдиган Трансафғон темир йўлидир.
Осиё ва Европа ўртасидаги савдо учун муқобил транспорт йўналишларини яратиши керак. ШҲТнинг бошқа транспорт инфратузилма лойиҳалари орасида Хитой–Марказий Осиё газ қувури, Хитой–Қозоғистон–Ўзбекистон ва Хитой–Қирғизистон темир йўллари, шунингдек, Хитой–Қирғизистон–Ўзбекистон автомобиль йўли мавжуд», — дейилади мақола.
Материал муаллифи Россияга нисбатан жорий этилган санкциялар туфайли ҳозирда Россия ва Беларусдан бу ерга кўчиб келаётган россиялик IT-мутахассислар оқими кузатилаётганини инобатга олиб, янги воқеликда Ўзбекистоннинг технологик ривожланиш истиқболларига тўхталди.
Мақола Ўзбекистон президентининг «Халқаро ва минтақавий ташкилотлар мамлакатлар ўртасидаги турли келишмовчиликларни енгиб ўтиш, ўзаро англашувни мустаҳкамлаш, сиёсий ва иқтисодий ҳамкорликни ривожлантириш, савдо-сотиқни кенгайтириш ҳамда маданий-гуманитар алмашинувни рағбатлантиришга ёрдам беради», деган иқтибос билан якунланди.
Шу билан бирга, муаллиф Ўзбекистоннинг ўзида 2022 йилда ялпи ички маҳсулотнинг 3,4 фоизга ўсиши кутилаётганига эътибор қаратади, бу эса Халқаро валюта жамғармаси Хитой учун тахмин қилгани билан бир хил ҳисобланади.
Изоҳ (0)