Бухорода ўтказилган «1000 тадбиркор аёл» форумида 100 нафар уй-жойга муҳтож аёлга ижтимоий ётоқхона топширилди. Бу ҳақда «Дарё»га вилоят Оила ва хотин-қизлар бошқармаси ахборот хизмати раҳбари Меҳринисо Ҳусаинова хабар берди.
Хотин-қизлар тадбиркорлигини қўллаб-қувватлаш ва ривожлантириш, «Аёллар дафтари»га киритилган хотин-қизлар бандлигини таъминлаш, уларни тадбиркорликка жалб қилиш орқали моддий манфаатдорлигини оширишга қаратилган форумда «Аёллар дафтари»даги мустақил иш бошлаш арафасида турган 100 нафар аёлга тадбиркорлигини бошлаши учун субсидия асосида печлар ва тикув машиналари берилди.Бундан ташқари, ҳаётда турли сабабларга кўра, оиласидан ажрашган ёки боқувчисини йўқотиб, норасида фарзандлари билан кўчада қолган, ойлаб, ҳатто йиллаб ижарама-ижара сарсон-саргардонликда юрган мададга муҳтож оилалар ҳам эътибордан четда қолмади. «1000 тадбиркор аёл» форумида шундай аёлларга кўмак бериш мақсади ҳам илгари сурилди. Бухоро шаҳридаги собиқ ‘Бухоротекс’ фабрикасига қарашли иншоотлардан бири замонавий қиёфада қайта барпо қилинди ва ижтимоий ётоқхона сифатида фойдаланишга топширилди, — деди бошқарма бошлиғи Феруза Ибрагимова.
Таъкидланишича, уч қаватдан иборат ушбу иншоот шу кунга қадар абгор аҳволда бўлган. «47-сон ХКМК» МЧЖ бунёдкорлари томонидан амалга оширилган қурилиш-таъмирлаш ишларидан сўнг бино кўркам қиёфага кирган. Лойиҳага давлат бюджети ҳисобидан 6 миллиард 320 миллион сўм ажратилган. Ётоқхона мукаммал таъмирдан чиқарилиб, 2 миллиардга яқин зарур инвентарлар билан жиҳозланган. Ижтимоий ётоқхона 440 ўринга мўлжалланган бўлиб, 100 та хонадан иборат.
Ҳар бир аёлнинг фарзанди билан бир шинам хонада рисоладагидек, умргузаронлик қилиши учун қулай имконият яратилган ётоқхона топширилганида йиғлаб юбордим. 35 ёшга кирдим, икки нафар фарзандим билан 15 йилдан ортиқ вақт ижарама-ижара юрдим. Кимдан дакки эшитдим, кимлар қиш-қировли кунларда ижара ҳақини тўлай олмаганим боис, қувиб солди. Бугун бошимда бошпанам бор. Ҳукуматга раҳмат, — дейди шундай ётоқхоналардан бирини олган фуқаро.
Булардан ташқари, «Аёллар дафтари»нинг 3-босқичига киритилган 15087 нафар ишсиз хотин-қизга амалий ёрдам кўрсатилди. Тадбиркорлик қилиш истагидаги 2390 нафар эҳтиёжманд хотин-қизга, 8643 нафар боқувчисини йўқотган, 6229 нафар ногиронлиги бўлган, 184 нафар уй-жойга муҳтож хотин-қизга 2319 нафар ночор ва фарзандида ногиронлик бўлган хотин-қизлар ҳам моддий қўллаб-қувватланди, — деди бошқарма бошлиғи.
Шунингдек, 2390 нафар тадбиркорлик қилиш истагида бўлган эҳтиёжманд хотин-қизларга, 8643 нафар боқувчиси бўлмаган эҳтиёжмандга, 6229 нафар ижтимоий ёрдамга муҳтож ногиронлиги бўлган ва тиббий муолажага муҳтожга, 184 нафар уй-жойга муҳтож эҳтиёжманд ҳамда 2319 нафар қарамоғида ногирон фарзанди бўлган эҳтиёжманд хотин-қизларга амалий ёрдам кўрсатилган.
Изоҳ (0)