Gulnora Karimova boshchiligidagi jinoiy guruh o‘zlashtirgan noqonuniy mablag‘larning Shveysariyada undiriladigan miqdori ma’lum qilindi

Gulnora Karimova boshchiligidagi jinoiy guruh tomonidan noqonuniy orttirilgan va Shveysariyada legallashtirilgan 686 million AQSH dollari  miqdoridagi mablag‘lar undirilishi bo‘yicha ishlar olib borilmoqda. Bu haqda bugun, 13-sentabr kuni Toshkent shahrida bo‘lib o‘tayotgan brifingda Adliya vaziri o‘rinbosari Muzraf Ikromov ma’lum qildi, deya xabar bermoqda “Daryo” muxbiri.

Muzraf Ikromovning ma’lum qilishicha, ayni paytda Shveysariya sudlarida 336 million AQSH dollari uzil-kesil musodara qilingan.

“O‘zbekiston va Shveysariya huquqni muhofaza qiluvchi organlarining tergov davomidagi hamkorligi, birgalikdagi keng ko‘lamli say-harakatlari natijasida Gulnora Karimova va uning boshchiligidagi uyushgan jinoiy guruh a’zolarining aktivlarini musodara qilish bo‘yicha ishlar Shveysariya sudlariga oshirilgan. Undirilishi lozim bo‘lgan jami summa taqriban 686 million AQSH dollariga teng.

Ushbu ish Shveysariya sudlarida ko‘rib chiqilib, taqriban 336 million AQSH dollari uzil-kesil musodara qilingan. Shundan 131 million dollar O‘zbekistonga qaytarilishi hal bo‘ldi. 205 million dollar bo‘yicha ishlar yakuniga yetmoqda. Hozirda qo‘shimcha 307 million AQSH dollari miqdoridagi mablag‘larni musodara qilish masalasi Shveysariya sudlarida ko‘rib chiqilmoqda”, – dedi vazir o‘rinbosari.

Ma’lum qilinishicha, 131 million dollar 10 haftada O‘zbekistonga qaytariladi.

Avvalroq O‘zbekiston va Shveysariya o‘rtasida Gulnora Karimovaning jinoiy aktivlarini Shveysariyadan qaytarish bo‘yicha yakuniy bitim imzolangani xabar qilingandi. Bitimda Gulnora Karimova boshchiligidagi uyushgan jinoiy guruh tomonidan noqonuniy ravishda orttirilgan va Shveysariyada legallashtirilgan 131 million dollarning O‘zbekistonga qaytarilishi belgilangan. Hujjatga ko‘ra, qaytarilgan mablag‘lar ijtimoiy sohaga, xususan, ta’lim va sog‘liqni saqlash sohalariga yo‘naltiriladi.

Shuningdek, fevral oyida Gulnora Karimova tomonidan jinoiy yo‘llar bilan egallangan mol-mulklarini mamlakatga qaytarish bo‘yicha amalga oshirayotgan ishlari natijasida Fransiyadan 10 million dollar O‘zbekistonga qaytarilgan.