Farg‘ona viloyati hokimi Xayrullo Bozorov boshchiligidagi delegatsiya joriy yilning 8—9-sentabr kunlari o‘zaro hamkorlikni rivojlantirish, manfaatli shartnomalar imzolash maqsadida Tojikistonning So‘g‘d viloyatida bo‘ldi. Bu haqda “Daryo” muxbiri Azizjon Ermatov xabar bermoqda.
Qayd etilishicha, tashrif dasturi doirasida dastlab Xayrullo Bozorov va So‘g‘d viloyati raisi Rajabboy Ahmadzodaning muloqoti va ortidan ikki viloyat rasmiylarining kengaytirilgan formatdagi uchrashuvi bo‘lib o‘tgan.
Shuningdek, safar davomida Xo‘jand shahrida Farg‘ona va So‘g‘d biznes-forumi hamda ikki viloyatda ishlab chiqarilgan mahsulotlar ko‘rgazmasi tashkillangan. Ko‘rgazmada Farg‘ona viloyatining 20 dan ortiq korxonalari qariyb 100 turdagi mahsulotlari bilan ishtirok etgan.
Ikki viloyatning 100 dan ziyod tadbirkorlari qatnashgan biznes-forumda hududlarning investitsiya, eksport va turizm salohiyati taqdimoti o‘tkazilgan.
Taqdimot davomida “Bahodir Log‘on tekstil” klasteri tomonidan So‘g‘d viloyati Asht tumanida 20 ming gektar yerni o‘zlashtirish, “Ismoiljon gilamlari” korxonasi tomonidan Bo‘ston shahrida gilam to‘qish sexini tashkil etish loyihalari amalga oshirilayotgani ta’kidlandi.
Farg‘ona va So‘g‘d tadbirkorlari o‘rtasida o‘tkazilgan B&B formatidagi uchrashuvlardan so‘ng ikki kun davomida erishilgan kelishuvlarni imzolash marosimi bo‘lib o‘tdi. Unda savdo-iqtisodiy hamkorlik yuzasidan umumiy qiymati 19 million dollar bo‘lgan 11 ta hujjat imzolandi.
Izoh (0)