O‘zbekistonda 2019—2021-yillar davomida paxta mavsumida majburiy mehnatga yo‘l qo‘ygan 178 nafar mansabdor javobgarlikka tortilgan. Bu haqda Bandlik va mehnat munosabatlari vaziri Nozim Husanov ma’lum qildi.
Bugun, 12-sentabr kuni Mehnat vazirligida vazir Nozim Husanov, hududlarda majburiy mehnatga yo‘l qo‘yilishiga qarshi kurashuvchi huquq faollari hamda OAV vakillari ishtirokida matbuot anjumani bo‘lib o‘tdi.
Unda so‘z olgan vazir Nozim Husanov ayni kunda hududlarda paxta terimi boshlanganini, bunday vaziyatlarda majburiy mehnatga yo‘l qo‘yilmasligini nazorat qilish vazirlik va ularning hamkorlari — majburiy mehnatga yo‘l qo‘yilishiga qarshi kurashuvchi huquq faollarining asosiy vazifalaridan biri ekanini ta’kidladi.
“Bugungi tadbirimizning asosiy maqsadi OAV vakillari o‘zlarini qiziqtirgan savolga nafaqat vazirlik mas’ullaridan, huquq faollaridan ham to‘g‘ridan to‘g‘ri javob olishini ta’minlash va birgalikda majburiy mehnatga qarshi kurashatganimizni yana bir bor ko‘rsatib berishdan iborat”, — dedi vazir Nozim Husanov.
Tadbirda ma’lumot berilishicha, O‘zbekistonda 2019-yildagi paxta mavsumida 132 nafar, 2020-yilda 41 nafar, 2021-yilda esa 5 nafar mansabdor majburiy mehnatga yo‘l qo‘ygani uchun javobgarlikka tortilgan.
Tadbir so‘ngida paxta mavsumida majburiy mehnatga qarshi kurashuvchi huquq faollariga milliy ekspert ruxsatnomalari topshirildi.
Izoh (0)