Ўзбекистонда 2019—2021 йиллар давомида пахта мавсумида мажбурий меҳнатга йўл қўйган 178 нафар мансабдор жавобгарликка тортилган. Бу ҳақда Бандлик ва меҳнат муносабатлари вазири Нозим Ҳусанов маълум қилди.
Бугун, 12 сентябрь куни Меҳнат вазирлигида вазир Нозим Ҳусанов, ҳудудларда мажбурий меҳнатга йўл қўйилишига қарши курашувчи ҳуқуқ фаоллари ҳамда ОАВ вакиллари иштирокида матбуот анжумани бўлиб ўтди.
Унда сўз олган вазир Нозим Ҳусанов айни кунда ҳудудларда пахта терими бошланганини, бундай вазиятларда мажбурий меҳнатга йўл қўйилмаслигини назорат қилиш вазирлик ва уларнинг ҳамкорлари — мажбурий меҳнатга йўл қўйилишига қарши курашувчи ҳуқуқ фаолларининг асосий вазифаларидан бири эканини таъкидлади.
«Бугунги тадбиримизнинг асосий мақсади ОАВ вакиллари ўзларини қизиқтирган саволга нафақат вазирлик масъулларидан, ҳуқуқ фаолларидан ҳам тўғридан-тўғри жавоб олишини таъминлаш ва биргаликда мажбурий меҳнатга қарши курашатганимизни яна бир бор кўрсатиб беришдан иборат», — деди вазир Нозим Ҳусанов.
Тадбирда маълумот берилишича, Ўзбекистонда 2019 йилдаги пахта мавсумида 132 нафар, 2020 йилда 41 нафар, 2021 йилда эса 5 нафар мансабдор мажбурий меҳнатга йўл қўйгани учун жавобгарликка тортилган.
Тадбир сўнгида пахта мавсумида мажбурий меҳнатга қарши курашувчи ҳуқуқ фаолларига миллий эксперт рухсатномалари топширилди.
Изоҳ (0)