13—18-sentabr kunlari Toshkent shahrida “Ipak yo‘li durdonasi” XIV Toshkent xalqaro kinofestivali bo‘lib o‘tishi va bu kinofestival davomida turli janrdagi yangi filmlarning namoyish etilishi, dunyoga mashhur kinoijodkorlar, aktyor va aktrisalarning tashrifi kutilmoqda. Kinematografiya agentligi axborot xizmati festivalda turk aktyorlari delegatsiyasi, jumladan, millionlab muxlislarning qalbidan joy olgan aktyor Burak O‘zchivitning ham ishtirok etishini ma’lum qildi.
Ma’lum bo‘lishicha, u Turkiya delegatsiyasi tarkibida Toshkentga tashrif buyuradi va boshqa turk aktyorlari bilan birga kinofestivalning asosiy tadbirlarida ishtirok etadi. Joriy yilning 15-sentabr kuni Forumlar saroyida tantanali ravishda ochiladigan “Turk kinosi kunlari” shular jumlasidandir.
Turkiya delegatsiyasi Toshkentda bir qator filmlar namoyishini o‘tkazib, 16-sentabr kuni Urganch shahriga jo‘nab ketadi va u yerda ham ikki kun davomida o‘z filmlarini namoyish etadi.
Aktyor Burak O‘zchivit ham Instagram sahifasida 14—15-sentabr kunlari kunlari O‘zbekistonda bo‘lishi haqida gapirgan.
“14—15-sentabr kunlari Toshkent kinofestivalida ishtirok etaman”, — deb yozgan aktyor sahifasiga.
2021-yilda Alisher Navoiy nomli kino saroyida O‘zbekiston Kinemotografiya agentligi tomonidan o‘tkazilgan “Ipak yo‘li durdonasi” Toshkent xalqaro kinofestivalining tantanali ochilish marosimida ham turk kinosi yulduzlari Dilan Chichek Dinez, Melisa Asli Pamuk, Selim Bayraktar, Erjan Kesal va Nazan Kesal ishtirok etgan edi.
Eslatib o‘tamiz, aktyor 2019-yilda Toshkentga muxlisalari bilan ziyofatda ishtirok etish uchun kelgan edi. Ular orasida O‘zbekistondagi nufuzli shaxslarning rafiqalari, biznes-ledilar, model biznesi vakilalari ham bo‘lgan. Aktyor o‘z iste’dodini qadrlovchi ayollar bilan 2,5 soatlik muloqoti evaziga u 2 million turk lirasi (qariyb 380 ming dollar) pul ishlab olgan. Bundan tashqari u O‘zbekiston unga juda yoqqanini, u yerda ko‘plab xushmuomala va mehmondo‘st kishilarni uchratgani, shu sababli albatta u yerga qaytib borishini ham ta’kidlab o‘tgan edi.
Aynan shu tashrif davomida aktyor Toshkent ko‘chalarini aylanib yurgan vaqtda muxlisalari uni o‘rab olgani aks etgan video tarqalgan edi. Unda qizlar aktyordan selfi tushish uchun to‘xtab turishni so‘ragani aks etgan. Keyinchalik bu holat ko‘plab muhokamalarga sabab bo‘lgan.
Mavzuga doir:
- “Bizni o‘z holimizga qo‘ying”: Turk aktyori Burak O‘zchivit homilador rafiqasi bilan yana urishib qoldi.
- “Sevgi iztirobi” seriali yulduzi Burak O‘zchivit Moskvada: Aktyor uni ko‘rish istagidagi muxlisalari qurshovidan tan soqchilari yordamida chiqishiga to‘g‘ri keldi (video).
- “Qurilish: Usmon” serialining suratga olish guruhi a’zolarini haqoratlagan aktyor Burak O‘zchivitga sud hukmi o‘qildi.
- “O‘zjan Denizdan Stiven Sigalgacha”. Toshkentdagi xalqaro kinofestivalning dabdabali qizil yo‘lakchasidan o‘tgan jahon yulduzlari (foto va video).
Izoh (0)