Xonanda Yorqinxo‘ja Umarov “Xalqlar do‘stligi” san’at saroyida jonli ijrodagi konsert dasturini taqdim etdi. “Daryo” muxbirlari konsertning so‘nggi kuniga tashrif buyurib, sahna va uning ortidagi qiziqarli voqealar haqida reportaj tayyorladi.
Yodingizda bo‘lsa, xonanda ilk konsertini 2019-yili “Xalqlar do‘stligi” san’at saroyida o‘tkazgandi. Uning ilk konsertida ham to‘liq jonli ijroda qo‘shiq kuylagani ko‘plab e’tiroflarga sazovar bo‘lgandi.
Uch blokdan iborat dasturda xonanda 22 ta qo‘shiqni jonli ijroda kuyladi.
Konsert rejissori, xonandani kashf etgan “The сover up” loyihasining boshlovchisi, aktyor Alisher Uzoqov bo‘ldi.
Xonandaning ilk konsertida qiziqchi Shukurullo Isroilov ishtirok etgandi. Yorqinxo‘ja Umarov bu safar ham uni mehmon san’atkor sifatida sahnaga chiqishini istadi.
Xonanda ajoyib ko‘rinish va jarangli ovoz sohibalari bo‘lgan “Allianas” guruhi bilan duet kuyladi.
Ularning dueti ingliz tilida kuylandi.
Dastur davomida Yorqinxo‘ja Umarovning muxlislari ham o‘zidek quvnoq ekanliklarini isbotlashdi. Ular qo‘shiqlarni shunchaki tinglamay, xonandaga jo‘r bo‘lishdi.
Yorqinxo‘ja Umarov “Yurt qadri” qo‘shig‘i bilan xalqimizga yaxshi tanish bo‘lgan Zohida Umarovaning o‘g‘li ekanini ko‘pchilik biladi. Konsert avvalida o‘g‘li bilan qo‘shiq kuylashdan qo‘rqishi haqida “Daryo”ga ma’lum qilgan sobiq xonanda sahnada o‘g‘li bilan qo‘shiq ijro etdi.
— Uch kundan beri konsertga kelaman. Agar o‘g‘lim 20 kun konsert bersa, shuncha kun kelishga ham og‘rinmayman. Menga zalning qaysi o‘rindig‘ida o‘tirish ahamiyatsiz. Men har kuni o‘g‘limni ko‘raman, buni intiqlik bilan kutgan muxlislar qancha. Shu bois, chekkaga o‘tib, muxlislar mazza qilib konsert ko‘rishlarini istadim. O‘g‘lim butun ovoz sohibi, uni hurmat qilib kelgan muxlislardan minnatdorman, — deydi Zohida Umarova.
Zohida Umarova o‘g‘li bilan duet kuylayotib, negadir uning ustidan suv quydi. Bu hol ko‘pchilikni ajablantirdi.
Shukurullo Isroilov xonandaning ko‘plab muxlislarini sahnaga taklif etib, ularnga mikrofon tutdi. Ba’zi muxlislarning ijrosi tomoshabinlarga yoqdi, ayrimlari esa qo‘shiqchi bo‘lish ham oson emasligini tushunishdi.
Konsertning uchinchi kuni “Aristokratlar” jamoasi vakillari gullar o‘rniga bir necha quti pitssa bilan tashrif buyurdi.
Muxlislari tomonidan berilgan ajoyib tuhfa — zarbof to‘n va do‘ppi bo‘ldi.
Konsert raqslarga boy bo‘ldi. Xonanda raqqos yigitlar bilan birdek raqsga tushib, tomoshabinlarga o‘zgacha kayfiyat ulashdi.
Odatda sahna ortida konsert rejissorlarining asabiylashishi, ijodiy jamoa bilan tortishishi yoki ularga dakki berayotganini ko‘rishga odatlanib qolgandik. Yorqinxo‘ja Umarovning konsert rejissori esa ancha xotirjam. Alisher Uzoqov dasturni zaldan turib tomosha qildi.
Konsert yarmida “Bravo” jamoasining a’zosi Shahlo Zoirova ham keldi. U sahnada maroq bilan raqsga tushdi.
Xullas, konsert a’lo darajada o‘tdi. Agar uning zavqini to‘liq his qilmoqchi bo‘lsangiz “Daryo”ning YouTube’dagi rasmiy kanali orqali tomosha qilishingiz mumkin.
Mavzuga doir:
- Zalni “jonlantirgan” Sevinch Mo‘minova, salomatligi og‘irlashgan xonanda va sahnaga chaqirilmagan Muhabbat Qurbonova — Vohidjon Isoqovning ilk konsertidan reportaj (foto va video)
- Musiqiy bilimga ega bo‘lmagan, kliplari hech qachon telekanallarda ko‘rsatilmagan yulduz. Jaloliddin Ahmadaliyevning ilk yakkaxon konsertidan reportaj (foto, video)
- “Qizil olma”dan “Sanamgina”gacha: Yulduz Usmonovaning “80—90-yil хitlari” konsert dasturidan reportaj (foto va video)
- Ahad Qayumning o‘xshamagan piari, sahnani egallagan vaynchilar. Hamdam Sobirovning ilk yakkaxon konsertidan reportaj (video)
- Sahnani qo‘riqlayotgan Halima va Mansur Agaliyevning ko‘z yoshlari. Yulduz Usmonovaning konsertidan reportaj (video)
Izoh (0)