O‘zbekiston yo‘llarida 7 oy ichida 139 ta holat bo‘yicha qariyb 6 milliard 132 million so‘mlik qurilish-montaj ishlari sifatsiz bajarilgan. Bu haqda Transport vazirligi huzuridagi Yo‘l-qurilish ishlari sifatini nazorat qilish inspeksiyasi axborot xizmati rahbari Komiljon Shamsiddinov ma’lum qildi.
Uning aytishicha, “O‘zyo‘linspeksiya” tomonidan 2022-yilning yanvar—iyul oylarida davomida yo‘l qurilishi obyektlari, sun’iy inshootlar (ya’ni ko‘prik va yo‘l o‘tkazgichlar) hamda yo‘l-qurilish materiallari ishlab chiqarishda normativ hujjatlar talablariga rioya etilishi o‘rganilib, 3155 ta obyektda nazorat o‘tkazildi.
Natijada 5846 ta qoida buzilish holatlari aniqlanib, ularni bartaraf etish uchun buyurtmachi, pudratchi, loyihachi va saqlovchi tashkilotlarga bajarilishi majburiy bo‘lgan 3590 ta ko‘rsatma berildi. 3026 ta ko‘rsatmadagi qoida buzilishlar bartaraf etildi. Qolgan 564 ta ko‘rsatmaning ijrosi ham qat’iy nazoratga olingan.
“Shuni alohida aytish kerakki, inspeksiya tomonidan yetti oy ichida 139 ta holat bo‘yicha umumiy summasi qariyb 6 milliard 132 million so‘mlik sifatsiz bajarilgan qurilish-montaj ishlari hajmini to‘lovdan chiqarish bo‘yicha buyurtmachilarga talabnomalar kiritildi. Shundan 4 milliard 203 million so‘mlik 92 ta talabnoma ijrosi ta’minlandi. Sodda qilib aytganda, shuncha miqdorga baholangan, lekin amalda sifatsiz bajarilgan qurilish va ta’mir ishlari pudratchilar tomonidan o‘z mablag‘lari hisobidan me’yoriy hujjatlar talablari asosida qaytadan bajarildi”, — degan “O‘zyo‘linspeksiya” axborot xizmati rahbari.
Uning qo‘shimcha qilishicha, yo‘l qurilish obyektlarida qo‘pol qoida buzilishlarga yo‘l qo‘ygan va davlat inspektorlari tomonidan berilgan ko‘rsatmalarni muddatida bartaraf etmagan mansabdor shaxslarga nisbatan “Ma’muriy javobgarlik to‘g‘risida”gi kodeksning 99- va 147-moddalariga ko‘ra 134 ta ma’muriy bayonnoma rasmiylashtirilib, sud organlariga yuborilgan. 120 ta bayonnoma bo‘yicha 175 million 410 ming so‘mlik jarima qo‘llanildi.
Izoh (0)