Ўзбекистон йўлларида 7 ой ичида 139 та ҳолат бўйича қарийб 6 миллиард 132 миллион сўмлик қурилиш-монтаж ишлари сифатсиз бажарилган. Бу ҳақда Транспорт вазирлиги ҳузуридаги Йўл-қурилиш ишлари сифатини назорат қилиш инспекцияси ахборот хизмати раҳбари Комилжон Шамсиддинов маълум қилди.
Унинг айтишича, «Ўзйўлинспекция» томонидан 2022 йилнинг январь—июль ойларида давомида йўл қурилиши объектлари, сунъий иншоотлар (яъни кўприк ва йўл ўтказгичлар) ҳамда йўл-қурилиш материаллари ишлаб чиқаришда норматив ҳужжатлар талабларига риоя этилиши ўрганилиб, 3155 та объектда назорат ўтказилди.
Натижада 5846 та қоида бузилиш ҳолатлари аниқланиб, уларни бартараф этиш учун буюртмачи, пудратчи, лойиҳачи ва сақловчи ташкилотларга бажарилиши мажбурий бўлган 3590 та кўрсатма берилди. 3026 та кўрсатмадаги қоида бузилишлар бартараф этилди. Қолган 564 та кўрсатманинг ижроси ҳам қатъий назоратга олинган.
«Шуни алоҳида айтиш керакки, инспекция томонидан етти ой ичида 139 та ҳолат бўйича умумий суммаси қарийб 6 миллиард 132 миллион сўмлик сифатсиз бажарилган қурилиш-монтаж ишлари ҳажмини тўловдан чиқариш бўйича буюртмачиларга талабномалар киритилди. Шундан 4 миллиард 203 миллион сўмлик 92 та талабнома ижроси таъминланди. Содда қилиб айтганда, шунча миқдорга баҳоланган, лекин амалда сифатсиз бажарилган қурилиш ва таъмир ишлари пудратчилар томонидан ўз маблағлари ҳисобидан меъёрий ҳужжатлар талаблари асосида қайтадан бажарилди», — деган «Ўзйўлинспекция» ахборот хизмати раҳбари.
Унинг қўшимча қилишича, йўл қурилиш объектларида қўпол қоида бузилишларга йўл қўйган ва давлат инспекторлари томонидан берилган кўрсатмаларни муддатида бартараф этмаган мансабдор шахсларга нисбатан «Маъмурий жавобгарлик тўғрисида»ги кодекснинг 99- ва 147-моддаларига кўра 134 та маъмурий баённома расмийлаштирилиб, суд органларига юборилган. 120 та баённома бўйича 175 миллион 410 минг сўмлик жарима қўлланилди.
Изоҳ (0)