Navoiyda jarima maydonidagi Mercedes-Benz avtodisklari almashtirib qo‘yilgani aniqlandi

Navoiyda jarima maydonidagi Mercedes-Benz’ga zarar yetkazilgani aniqlandi, deb xabar bermoqda O‘zA.

Ma’lum qilinishicha, viloyatning Xatirchi tumanida yashovchi fuqaro S.Q.ga tegishli bo‘lgan Mercedes-Benz rusumli mashina ma’lum sabablarga ko‘ra tuman IIB tomonidan jarima maydoniga qo‘yilgan. Fuqaro barcha to‘lov va rasmiyatchiliklarni amalga oshirib mashinani jarima maydonchasidan chiqarish uchun kelganida uning 9 million 800 ming so‘m qiymatga ega avtodisklari almashtirilgani hamda avtomashina jarima maydonida yomon holatda saqlangani ma’lum bo‘lgan.

Bu holatlardan norozi bo‘lgan fuqaro iste’molchi sifatida huquqlari buzilayotgani va bu borada amaliy yordam ko‘rsatishlarini so‘rab tuman iste’molchilar huquqlarini himoya qilish jamiyatiga murojaat qilgan.

Olib borilgan o‘rganishlar jarayonida iste’molchining noroziliklari o‘z tasdig‘ini topgan. Kuzatuv kameralaridagi yozuvlardan avtodisklarni uning sobiq egasi aldov yo‘li bilan almashtirib ketgani va haqiqatda ham jarima maydonchasida avtomobil yomon holatda saqlangani ma’lum bo‘lgan.

Xatirchi tuman iste’molchilar huquqlarini himoya qilish jamiyati xodimlarining aralashuvi bilan avtodisklar egasiga qaytarilib, avtomashinaga texnik xizmat ko‘rsatilgan.