“Paxtakor” bosh murabbiyi Maksim Shatskix O‘zbekiston Kubogi chorak finali doirasida “Navbahor”ga qarshi kechgan o‘yindan (1:2) so‘ng o‘z fikrlari bilan o‘rtoqlashdi.
O‘yin haqidaBu mavzuni yana gapirgim kelmayapti. Ammo bir gap hayolimga keldi: “Sovet davridagi uy hakamligi”. O‘zbekiston mustaqil bo‘lganiga 31 yil bo‘ldi, Sobiq Ittifoq hozirda mavjud emas. Biroq bugun bildimki, u hali ham kimlarningdir miyasida tirik ekan.
Gap bunda ham emas. Gap biz haqimizda ham emas. Biz bunga ko‘nikamiz, o‘tib ketadi. Gap shundaki, futbolning ustidan kulishmoqda. Mana shu narsa alam qilyapti. Futbol maydoniga borini tashlab, jonini berayotgan yigitlarning ustidan kulishmoqda. Gapiradigan gap ko‘p. Shunchaki bizning ustimizdan kulishmoqda, tupurib qo‘yishmoqda desa ham bo‘ladi.
Hammasi ko‘rinib turibdi. Umid qilamanki, hammasi o‘z joyiga tushadi. O‘yinga kelsak, men doim yigitlarga “agar biz o‘zimizga gol urmasak, birov bizga gol ura olmaydi”, deb aytaman. Chempionatdagi hech qaysi jamoa bizni ustunlik bilan mag‘lub qila olmaydi. Bu faqat bizga bog‘liq: biz yoki o‘zimizga gol olib kelamiz, yoki gol uramiz.
O‘yindan keyin shogirdlarimni tabriklab qo‘ydim. Nimadir o‘xshadi, nimadir o‘xshamadi. Ammo biz o‘yinni to‘liq nazorat qildik. Bitta gol urib, ikkita o‘tkazib yubordik. Bu qo‘rqinchli emas. Oldinda chempionat kutib turibdi. Xotirjamlikni saqlaymiz va chempionat o‘yinlariga puxta tayyorgarlik ko‘ramiz.
Mag‘lubiyatga sabab haqida
Bizning xatolar. Bu hakamlikdan so‘ng ham g‘alaba qozonishimiz kerak edi. Ammo yana qaytaraman, mag‘lubiyatga bizning yosh bolalarcha qilgan xatolarimiz sabab bo‘ldi.
Mundial orzu bo‘lib qolishi haqidagi gaplari borasida
Men o‘shanda muxlislar Jahon Chempionatiga chiqishni juda istashlari va anchadan beri kutayotganlari haqida gapirganman. Menga Jahon Chempionatiga chiqish nasib qilmadi. Biz hozir ham mundialga chiqmoqchimiz. Ammo bunday futbol bilan hali juda uzoq kutishimizga to‘g‘ri keladi. Juda uzoq.
O‘sha internetdagi so‘zlarimni mana yana qaytardim. Yana saralash o‘yinlari boshlanadi va biz yana Jahon Chempionatiga chiqamiz deymiz. Biz chiqa olmaymiz. Yer yuzida mo‘jizalar bo‘lmaydi. Jahon Chempionatiga chiqish uchun hozir bu yerda nimanidir o‘zgartirish kerak. Shunchaki mening so‘zlarimni eslab qoling. Mana shu siklda, keyingi siklda ushbu so‘zlarimni yodga oling.
“Paxtakor”da ham “Navbahor” kabi muxlislari bo‘lishini xohlashi haqida
Bizda ham shunday bo‘ladi. Bu yo‘nalish bo‘yicha ishlayapmiz. Bilasizmi, poytaxtda har doim shunday bo‘lgan. Poytaxtda muxlislarni stadionga olib kirish juda qiyin ish. Bu dunyoning deyarli barcha poytaxtlarida kuzatiladigan holat.
Viloyatlarda deyarli barcha uchrashuvlarga muxlislar kiradi. Poytaxtda esa muxlislar tanlaydi. “Neftchi” bilan o‘yin bo‘lsa uyda tomosha qilaman deydi. “Navbahor”ga qarshi balki stadionga tushadi. OCHL yoki terma jamoa o‘yinlari bo‘lsa muxlislar albatta stadionga keladi. Nega bundayligini men bilmayman. Toshkentdagi istalgan stadionni olmang, muxlislar borasida vaziyat shunday.
“Navbahor”ning imkoniyatlari haqida
Men baholay olmayman. 30-oktabr kuni final o‘yini. O‘shanda bilib olamiz. Har doim oxiridagi natija hal qiladi. O‘yin borasidagi imkoniyatlarga kelsak, men bu gaplarni “Paxtakor” murabbiyi ekanligim uchun aytmayapman, ammo “Paxtakor” o‘yin borasida “Navbahor”dan kuchliroq. Biroq barchasini nima hal qiladi? Natija. Hozir biz shunday vaziyatdamiz.
Maksim Shatskix, “Paxtakor” bosh murabbiyi
Izoh (0)