«Пахтакор» бош мураббийи Максим Шацких Ўзбекистон Кубоги чорак финали доирасида «Навбаҳор»га қарши кечган ўйиндан (1:2) сўнг ўз фикрлари билан ўртоқлашди.
Ўйин ҳақидаБу мавзуни яна гапиргим келмаяпти. Аммо бир гап ҳаёлимга келди: «Совет давридаги уй ҳакамлиги». Ўзбекистон мустақил бўлганига 31 йил бўлди, Собиқ Иттифоқ ҳозирда мавжуд эмас. Бироқ бугун билдимки, у ҳали ҳам кимларнингдир миясида тирик экан.
Гап бунда ҳам эмас. Гап биз ҳақимизда ҳам эмас. Биз бунга кўникамиз, ўтиб кетади. Гап шундаки, футболнинг устидан кулишмоқда. Мана шу нарса алам қиляпти. Футбол майдонига борини ташлаб, жонини бераётган йигитларнинг устидан кулишмоқда. Гапирадиган гап кўп. Шунчаки бизнинг устимиздан кулишмоқда, тупуриб қўйишмоқда деса ҳам бўлади.
Ҳаммаси кўриниб турибди. Умид қиламанки, ҳаммаси ўз жойига тушади. Ўйинга келсак, мен доим йигитларга «агар биз ўзимизга гол урмасак, биров бизга гол ура олмайди», деб айтаман. Чемпионатдаги ҳеч қайси жамоа бизни устунлик билан мағлуб қила олмайди. Бу фақат бизга боғлиқ: биз ёки ўзимизга гол олиб келамиз, ёки гол урамиз.
Ўйиндан кейин шогирдларимни табриклаб қўйдим. Нимадир ўхшади, нимадир ўхшамади. Аммо биз ўйинни тўлиқ назорат қилдик. Битта гол уриб, иккита ўтказиб юбордик. Бу қўрқинчли эмас. Олдинда чемпионат кутиб турибди. Хотиржамликни сақлаймиз ва чемпионат ўйинларига пухта тайёргарлик кўрамиз.
Мағлубиятга сабаб ҳақида
Бизнинг хатолар. Бу ҳакамликдан сўнг ҳам ғалаба қозонишимиз керак эди. Аммо яна қайтараман, мағлубиятга бизнинг ёш болаларча қилган хатоларимиз сабаб бўлди.
Мундиал орзу бўлиб қолиши ҳақидаги гаплари борасида
Мен ўшанда мухлислар Жаҳон Чемпионатига чиқишни жуда исташлари ва анчадан бери кутаётганлари ҳақида гапирганман. Менга Жаҳон Чемпионатига чиқиш насиб қилмади. Биз ҳозир ҳам мундиалга чиқмоқчимиз. Аммо бундай футбол билан ҳали жуда узоқ кутишимизга тўғри келади. Жуда узоқ.
Ўша интернетдаги сўзларимни мана яна қайтардим. Яна саралаш ўйинлари бошланади ва биз яна Жаҳон Чемпионатига чиқамиз деймиз. Биз чиқа олмаймиз. Ер юзида мўъжизалар бўлмайди. Жаҳон Чемпионатига чиқиш учун ҳозир бу ерда ниманидир ўзгартириш керак. Шунчаки менинг сўзларимни эслаб қолинг. Мана шу циклда, кейинги циклда ушбу сўзларимни ёдга олинг.
«Пахтакор»да ҳам «Навбаҳор» каби мухлислари бўлишини хоҳлаши ҳақида
Бизда ҳам шундай бўлади. Бу йўналиш бўйича ишлаяпмиз. Биласизми, пойтахтда ҳар доим шундай бўлган. Пойтахтда мухлисларни стадионга олиб кириш жуда қийин иш. Бу дунёнинг деярли барча пойтахтларида кузатиладиган ҳолат.
Вилоятларда деярли барча учрашувларга мухлислар киради. Пойтахтда эса мухлислар танлайди. «Нефтчи» билан ўйин бўлса уйда томоша қиламан дейди. «Навбаҳор»га қарши балки стадионга тушади. ОЧЛ ёки терма жамоа ўйинлари бўлса мухлислар албатта стадионга келади. Нега бундайлигини мен билмайман. Тошкентдаги исталган стадионни олманг, мухлислар борасида вазият шундай.
«Навбаҳор»нинг имкониятлари ҳақида
Мен баҳолай олмайман. 30 октябрь куни финал ўйини. Ўшанда билиб оламиз. Ҳар доим охиридаги натижа ҳал қилади. Ўйин борасидаги имкониятларга келсак, мен бу гапларни «Пахтакор» мураббийи эканлигим учун айтмаяпман, аммо «Пахтакор» ўйин борасида «Навбаҳор»дан кучлироқ. Бироқ барчасини нима ҳал қилади? Натижа. Ҳозир биз шундай вазиятдамиз.
Максим Шацких, «Пахтакор» бош мураббийи
Изоҳ (0)