Namangan shahridagi “Afsonalar vodiysi” bog‘i amfiteatrida Mustaqillikning 31 yilligiga bag‘ishlangan tantanali bayram tadbiri bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Tadbirga senator va deputatlar, viloyat faollari, korxona va tashkilot rahbarlari, nuroniylar va yoshlar vakillari taklif etildi.
Bayram tadbiri O‘zbekiston madhiyasi ijrosi bilan boshlandi. Shundan so‘ng Namangan viloyati hokimi Shavkat Abdurazzaqov so‘z oldi.
Hokimning ta’kidlashicha, bayram arafasida viloyatda 103 ta investitsiya loyihasiga start berildi va 61 ta ijtimoiy soha obyekti faoliyatini boshladi. Yaqin orada Uchqo‘rg‘on va Norin tumanlarini markaz bilan bog‘lovchi 17,5 kilometr uzunlikdagi zamonaviy yo‘l hamda Norin daryosi ustida yangi ko‘prik quriladi.
Shundan so‘ng namoyish etilgan adabiy kompozitsiyada ulug‘ ajdodlar, qatag‘on qurbonlari, xususan, bu yil tavalludining 110-yilligini nishonlanayotgan namanganlik buyuk shoir Usmon Nosir siymosiga alohida e’tibor berildi.
Bayram dasturida millatlararo do‘stlik, mahallalardagi o‘zgarishlar asosiy mavzuga aylandi. Turli tillardagi taronalar yangradi, qardosh xalqlarning raqslari ijro etildi.
Kechaning badiiy qismida namanganlik san’atkorlar Jaloliddin Usmonov, Shavkat Xamdamov, Komron Mamadaliyev, estrada yulduzlari Ziyoda va Janob Rasulning qo‘shiqlari barchani davraga chorladi.
Tantanali marosim bayram mushakbozligi bilan yakunlandi.
Izoh (0)