Ижтимоий тармоқларда Сурхондарё вилояти ИИБ ЖХХ ЙҲХБ тасарруфидаги Tracker хизмат машинаси йўл ҳаракати қоидаларини бузгани учун ҳисобланган жарималар ундирилмаётгани тўғрисида хабарлар тарқалди. Вилоят прокуратураси ҳолат юзасидан маълумот берди.
Аниқланишича, Сурхондарё вилояти ИИБ ЖХХ ЙҲХБ тасарруфида бўлган махсус жиҳозланган Tracker русумли 75 330 VSF давлат рақам белгили хизмат машинаси Сурхондарё вилояти ИИБ ЖХХ ЙҲХБ ЙПХБ 3-сафарбар гуруҳи командирига хизматда фойдаланиш учун бириктирилган.
Сурхондарё вилояти ИИБ ЖХХ ЙҲХБда ўрнатилган махсус автоматлаштирилган фото ва видео қайд этиш техника воситалари орқали аниқланган ҳуқуқбузарликларни қайд этиш маълумотлар базаси текшириб кўрилган.
Текширув натижасида ушбу транспорт воситаси мулкдорига нисбатан Маъмурий жавобгарлик тўғрисидаги кодекснинг 171, 3091, 248, 304, ва 307-моддаларига асосланган ҳолда 77 та ҳолатда белгиланган ҳаракат тезлиги оширганлик ҳолати юзасидан ЙҲХБ МАБ масъул ходимлари томонидан жарима белгилангани аниқланган.
«Сурхондарё вилояти ҳудудида содир этилган 77 та ҳолат вилоят ҳудудида жамоат тартибини сақлаш, жиноятчиликни олдини олиш, вилоятга ташриф буюрган юқори мартабали меҳмонларни хавфсизлигини таъминлаш, вилоят ҳудудида ўтказиладиган оммавий тадбирлар ва ўқув машғулотларида ҳаракат хавфсизлигини таъминлаш ва ўз вақтида белгиланган топшириқларни амалга оширишда, пул ва портловчи моддаларни ўз вақтида кечиктирмасдан манзилига етказиш мақсадида кузатувларни амалга ошириш жараёнида белгиланган ҳаракат тезлигини охирги зарурат ҳолатида амалга оширгани бўйича ЙҲХБ МАБ масъул ходимлари томонидан қайта кўриб чиқилмоқда», — дейилади хабарда.
Изоҳ (0)