O‘zbekiston bosh vaziri o‘rinbosari Jamshid Xo‘jayev 29-avgust kuni BAA energetika va infratuzilma vaziri bilan investitsiya hamkorligi istiqbollarini muhokama qildi, xabar bermoqda Investitsiyalar va tashqi savdo vazirligi.
Qayd etilishicha, vazir Jamshid Xo‘jayev videokonferensaloqa vositasida Birlashgan Arab Amirliklarining energetika va infratuzilma vaziri Suxeyl Muhammad al-Mazrui bilan muzokaralar o‘tkazdi. Ma’lumotga ko‘ra, muzokaralar davomida ikki mamlakat o‘rtasidagi investitsiyaviy munosabatlarning keng qamrovli masalalari, shuningdek, strategik sheriklik va qo‘shma loyihalarni amalga oshirishning asosiy yo‘nalishlari bo‘yicha o‘zaro hamkorlikning amaliy jihatlari muhokama qilindi.
Tomonlar savdo-iqtisodiy sohada, shuningdek, an’anaviy va muqobil energetika, logistika, sog‘liqni saqlash, qishloq xo‘jaligi va turizm yo‘nalishlarida jadal rivojlanayotgan hamkorlikni qayd etdi. Muzokaralar davomida investitsiyalar sohasida o‘zaro hamkorlikni rivojlantirish istiqbollari muhokama qilindi. Ta’kidlanganidek, bugungi kunda qo‘shma investitsiya portfeli umumiy qiymati 3 milliard dollarga yaqin bo‘lgan 17 ta loyihadan iborat.
E’lon qilingan kapitali 1 milliard dollarni tashkil etuvchi O‘zbekiston–BAA qo‘shma investitsiya kompaniyasi faoliyatining natijalari yuqori baholandi. Kompaniya bugungi kunda 100 million dollardan ko‘proq mablag‘ni o‘zlashtirgan. Shuningdek, Birlashgan Arab Amirliklarining Mubadala va Taka kompaniyalari tomonidan Tollimarjon IESning mavjud bloklarini xususiylashtirish va negizida yangi energiya bloklarini qurish loyihasini amalga oshirish muhimligi ta’kidlandi.
Shu nuqtai nazardan, Toshkent shahrida huquqiy bitimlar imzolashga tayyorgarlik ko‘rish muddatlari muhokama qilindi. Muzokaralar yakunida O‘zbekiston va BAA o‘rtasidagi hamkorlikni mustahkamlash maqsadida konstruktiv fikr almashishni davom ettirish bo‘yicha kelishuvga erishildi.
Izoh (0)