Ўзбекистон бош вазири ўринбосари Жамшид Хўжаев 29 август куни БАА энергетика ва инфратузилма вазири билан инвестиция ҳамкорлиги истиқболларини муҳокама қилди, хабар бермоқда Инвестициялар ва ташқи савдо вазирлиги.
Қайд этилишича, вазир Жамшид Хўжаев видеоконференцалоқа воситасида Бирлашган Араб Амирликларининг энергетика ва инфратузилма вазири Сухейл Муҳаммад ал-Мазруи билан музокаралар ўтказди. Маълумотга кўра, музокаралар давомида икки мамлакат ўртасидаги инвестициявий муносабатларнинг кенг қамровли масалалари, шунингдек, стратегик шериклик ва қўшма лойиҳаларни амалга оширишнинг асосий йўналишлари бўйича ўзаро ҳамкорликнинг амалий жиҳатлари муҳокама қилинди.
Томонлар савдо-иқтисодий соҳада, шунингдек, анъанавий ва муқобил энергетика, логистика, соғлиқни сақлаш, қишлоқ хўжалиги ва туризм йўналишларида жадал ривожланаётган ҳамкорликни қайд этди. Музокаралар давомида инвестициялар соҳасида ўзаро ҳамкорликни ривожлантириш истиқболлари муҳокама қилинди. Таъкидланганидек, бугунги кунда қўшма инвестиция портфели умумий қиймати 3 миллиард долларга яқин бўлган 17 та лойиҳадан иборат.
Эълон қилинган капитали 1 миллиард долларни ташкил этувчи Ўзбекистон–БАА қўшма инвестиция компанияси фаолиятининг натижалари юқори баҳоланди. Компания бугунги кунда 100 миллион доллардан кўпроқ маблағни ўзлаштирган. Шунингдек, Бирлашган Араб Амирликларининг Mubadala ва Таkа компаниялари томонидан Толлимаржон ИЭСнинг мавжуд блокларини хусусийлаштириш ва негизида янги энергия блокларини қуриш лойиҳасини амалга ошириш муҳимлиги таъкидланди.
Шу нуқтаи назардан, Тошкент шаҳрида ҳуқуқий битимлар имзолашга тайёргарлик кўриш муддатлари муҳокама қилинди. Музокаралар якунида Ўзбекистон ва БАА ўртасидаги ҳамкорликни мустаҳкамлаш мақсадида конструктив фикр алмашишни давом эттириш бўйича келишувга эришилди.
Изоҳ (0)