O‘zbekistonda kon-metallurgiya sanoati uchun ekologik talablar o‘rnatiladi

Vazirlar Mahkamasining “Kon-metallurgiya sanoati sohasida ekologik talablarni va atrof muhit muhofazasi me’yorlarini xalqaro standartlar asosida belgilash chora-tadbirlari to‘g‘risida”gi qarori qabul qilindi.

Mazkur qaror bilan Ekologiya va atrof-muhitni muhofaza qilish davlat qo‘mitasi, Iqtisodiy taraqqiyot va kambag‘allikni qisqartirish vazirligi va boshqa ma’sul davlat organlariga quyidagi vazifalar yuklatilgan:

• kon-metallurgiya sanoatida ekologik talablarni va atrof muhit muhofazasi me’yorlarni xalqaro “yashil iqtisodiyot” maqsadlariga erishish indeksi (Global Green Growth Index) asosida jahondagi o‘nta eng yaxshi mamlakat darajasiga yetkazish (dunyo bo‘yicha Shvetsiya, Daniya, Chexiya va Germaniya, MDH mamlakatlari orasida Gruziya, Markaziy Osiyoda esa Qirg‘iziston mazkur indeksda eng yuqori ko‘rsatkichlarga ega);
• kon-metallurgiya sanoati korxonalarida kam chiqitli va resurslarni tejaydigan texnologiyalarni joriy etish, tabiatni muhofaza qilish hamda tabiiy resurslarni qayta tiklashda samara beruvchi faoliyatni davlat tomonidan qo‘llab-quvvatlash;
• kon-metallurgiya sanoati korxonalarida xalqaro standartlar asosida bosqichma-bosqich shaffof va samarali ekologik menejment tizimini joriy etishga qaratilgan eng maqbul tartibga solish siyosatini yuritish.

• Atrof-muhitga chiqariladigan ifloslantiruvchi moddalar ekologik talablar doirasidan oshmasligini ta’minlash;
• Kon-metallurgiya sanoati korxonalarida ilg‘or xorijiy tajribadan kelib chiqib ekologik menejment tizimini joriy etish.

• Global tashabbuskorlik hisoboti (Global Reporting Initiative, GRI) hamda Atrof muhit, ijtimoiy va boshqaruv (Environmental Social Governance, ESG ) tartibi asosida uzoq muddatli ekologiya va atrof-muhitni muhofaza qilish strategiyasini ishlab chiqish;
• “yashil mahsulot” ishlab chiqarishni kengaytirish;
• tadqiqotlar, hamkorlik kelishuvlari va innovatsion yechimlar orqali bioxilma-xillikka salbiy ta’sirning oldini olish va kamaytirish;
• suvni tejash maqsadida aylanma suvlardan keng foydalanish ishlarini jadallashtirish va u bilan bog‘liq muhim samaradorlik ko‘rsatkichlarini ishlab chiqish;
• atmosfera havosiga ifloslantiruvchi moddalarni chiqarishni keskin kamaytirishga erishish.