Toshkent shahri va Namangan viloyatida ishga kiritib qo‘yish bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar berdi.
Bosh prokuratura huzuridagi departamentning Mirobod tumani bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Unda “G.G.” MCHJ rahbari G‘.L. 8 nafar fuqaroni o‘zi rahbarlik qilayotgan korxonaga ishga qabul qilishga ishontirib, ularning nomiga hududiy tijorat banki filialidan jami 176 million so‘m kredit ajratilishiga erishib, kredit mablag‘larini firibgarlik yo‘li bilan o‘zlashtirgani aniqlangan.
Shu kabi, departament hamda DXXning Namangan viloyati boshqarmalari tomonidan o‘tkazilgan tezkor tadbirda fuqaro S.X. boshqa bir fuqaro Z.ni tanishlari yordamida 4200 dollar evaziga Polshaga ishga yuborishga kelishib, shundan 300 dollar va 2,2 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)