O‘zbekistonning Qohiradagi elchixonasi va mamlakatning Virusologiya ilmiy tekshirish instituti tomonidan olib borilgan muzokaralar natijasida Misr hukumati tomonidan O‘zbekiston xalqiga gepatit C virusiga qarshi 30 ming dona dori vositasi beg‘araz taqdim qilindi, deb xabar bermoqda “Dunyo”.
Insonparvarlik ko‘magi tarkibini umumiy qiymati 300 ming dollardan ortiq bo‘lgan 15 ming dona “Sofosbuvir” va 15 ming dona “Daklatasvir” dori vositalari tashkil qildi. Ushbu dori vositalari, eng avvalo, Orolbo‘yi mintaqasi, shuningdek, Qashqadaryo, Namangan, Toshkent viloyatlari va mamlakatning boshqa hududlarida istiqomat qilayotgan, gepatit C virusiga chalingan bemorlar ehtiyoji uchun yetkazilishi rejalashtirilmoqda. Dorilar Virusologiya ilmiy tekshirish institutining mas’ul xodimlari tomonidan taqsimlanadi.
Gepatit C — “muloyim qotil” deb ta’rif beriladigan ushbu kasallik turi ko‘pincha jigar sirrozi yoki saratoniga sabab bo‘lishi mumkin. Kasallik, asosan, qon orqali, ya’ni ehtiyotsizlik sabab stomatolog, manikyur va boshqa amaliyotlarda qon teggan buyumdan boshqa bir insonga yuqishi mumkin. Shuningdek, tish cho‘tkasi yoki soqol oladigan uskuna ham virus yuqishi uchun sabab bo‘ladi.
Mavzuga doir: “Muloyim qotil”, “kir qo‘llar kasalligi”. Gepatit qanday yuqadi va uning turlari haqida nimalarni bilish kerak?
Izoh (0)