O‘zbekiston Mustaqilligining 31 yilligi bayramiga tuhfa sifatida “Nukus” umumqo‘shin poligonida artilleriya olovini boshqarishga qo‘shimcha qulaylik yaratish maqsadida artilleriya qo‘mondonlik punkti majmuasi foydalanishga topshirildi. Bu haqda Shimoli-g‘arbiy harbiy okrug matbuot xizmati “Daryo”ga ma’lum qildi.
Yangi obyektning ochilish marosimida Shimoli-g‘arbiy harbiy okrug qo‘shinlari qo‘mondonligi, Nukus harbiy prokuratura organi rahbariyati, artilleriya mutaxassislari ishtirok etdi. So‘zga chiqqanlar mamlakat Qurolli kuchlarini jadal rivojlantirish, harbiy xizmatchilarning kasbiy malaka va soha bo‘yicha mahoratini yanada oshirish maqsadida qo‘shinlarda o‘quv-moddiy bazani takomillashtirish, zamonaviy qurol-aslaha va harbiy texnikalar bilan butlash, mashg‘ulotlarga axborot-kommunikatsiya vositalarini keng joriy etishda katta yutuqlarga erishilayotganini ta’kidladi.
Zamonaviy o‘quv joylari va trenajyorlari, jangovar tayyorgarlik obyektlarida soha sirlarini puxta o‘zlashtirayotgan yurt himoyachilari mamlakat mudofaa salohiyatini yuksaltirishga hissa qo‘shish bilan birga xalqaro miqyosdagi musobaqalarda ham yetakchi xorijiy armiyalar bilan tengma-teng bahslashayotgani e’tirof etildi.
Yangi barpo etilgan majmua maydon kuzatuvi va bo‘linmalarning harakatini boshqarishga qulay bo‘lishi uchun oldindan mavjud bo‘lgan 65 metrli tepalik ustida qurildi. Artilleriya va umumqo‘shin bo‘linmalari jangini hamda artilleriya olovini boshqarish, artilleriya olovi yo‘naltiruvchilari hamda uchuvchisiz uchish apparatlari instruktorlari ish faoliyatini tashkil etish uchun mo‘ljallangan majmua tarkibidan ikki qavatli artilleriya qo‘mondonlik punkti va yerto‘ladagi artilleriya kuzatuv punkti obyektlari joy olgan. Kuzatish moslamalarisiz 8–10 kilometr ochiq maydonni bemalol kuzatishga qulaylik yaratgan ushbu majmua iqlim injiqliklaridan harbiy xizmatchilarni asrab, artilleriyachilarning jangni yashirin tarzda boshqarish uchun keng qulayliklar yaratadi.
Divizion va batareya kuzatuv punkti shartli dushman joylashgan joyni hamda ajratilgan hududni razvedka qilish, bo‘linmalar o‘tli zarbasi va manyovrini boshqarish, umumqo‘shin bo‘linmalar harakatini kuzatish va boshqa bo‘linmalar bilan hamkorlikni ushlab turish kabi vazifalar uchun mo‘ljallangan. Unda artilleriya divizioni va batareya qo‘mondonligi joylashib, jangni tashkil etish va olib borishni amalga oshiradi.
Ikki qavatdan iborat bo‘lgan artilleriya qo‘mondonlik punktining yuqori qismida maydon kuzatuvini amalga oshirish uchun yopiq joy va artilleriya bo‘linmalari bilan olovni boshqarish bo‘yicha mashg‘ulotlarni tashkil etish, o‘quv-jangovar harakatlarni rejalashtirish va nazorat qilish uchun mashg‘ulot xonasi mavjud. Bino oldida yaratilgan hududning kichraytirilgan maketi artilleriya qurilmalaridan o‘t ochishni rejalashtirish va olovni boshqarishga qo‘shimcha ravishda yordam beradi. Majmua tarkibida sanitar tizim hamda texnikalarning vaqtincha turar joyi ham o‘rin olgan.
Tadbir davomida mazkur majmuaning yaratilishida jonbozlik ko‘rsatgan bir guruh harbiy xizmatchilar okrug qo‘shinlari qo‘mondonligi tomonidan munosib rag‘batlantirildi. Ishtirokchilar tomonidan mazkur o‘quv obyektida kelgusida katta mashg‘ulotlar, xalqaro darajadagi o‘quvlar o‘tkazilishiga ishonch bildirildi.
Izoh (0)