Finlyandiya Milliy kutubxonasi fondlarida O‘zbekiston tarixi va madaniyatiga oid 300 dan ortiq qo‘lyozma aniqlandi. Bu haqda “Dunyo” axborot agentligi xabar qilmoqda.
Qayd etilishicha, O‘zbekistonning Finlyandiyadagi elchisi Qadamboy Sultonov va O‘zbekiston davlat jahon tillari universiteti hamda Toshkent davlat sharqshunoslik universiteti kafedra mudiri, professor, qo‘lyozma tadqiqotlari sohasidagi taniqli mutaxassis Gulnoz Xalliyeva uchrashuvi chog‘ida bu to‘g‘risida ma’lum qilingan.
Gulnoz Xalliyeva 1–26 avgust kunlari Finlyandiyada bo‘lib, Innovatsion rivojlanish vazirligining “Yevropa fondlarida saqlanayotgan, O‘zbekistonda mavjud bo‘lmagan turkiy qo‘lyozmalarning ma’lumotlar bazasini va “Yevroturcologica.uz” elektron platformasini yaratish” grant loyihasi doirasida tegishli qo‘lyozmalarni aniqlash bo‘yicha tadqiqotlar olib borgan.
Tashabbus davlat rahbarining 2017-yil 24-maydagi “Qadimiy yozma manbalarni saqlash, tadqiq va targ‘ib qilish tizimini yanada takomillashtirish chora-tadbirlari to‘g‘risida”gi qarori ijrosini ta’minlashga qaratilgan.
Finlyandiya Milliy kutubxonasida olib borilgan ilmiy izlanishlar natijasida o‘zbek olimi bu yerda O‘zbekistonning qadimiy tarixi va madaniyatiga oid 300 dan ortiq qo‘lyozma asar mavjudligini aniqlashga muvaffaq bo‘ldi. Ulardan 11 tasi O‘zbekistonda o‘xshashi bo‘lmagan so‘fiylik lug‘atlarining qo‘lyozma nusxalari, foydali o‘tlar xususiyatlari tavsifi va boshqa qimmatli materiallardan iborat.
Gulnoz Xalliyevaning aytishicha, eng qimmatli topilmalardan biri qadimgi Xorazm tarixiga oid bo‘lib, Munis va Ogahiyning qalamiga mansub “Firdavs ul-iqbol” asaridir. Manbalarga qaraganda, ushbu asarning 9 ta qo‘lyozmasi ma’lum bo‘lib, Finlyandiyada saqlanayotgan nusxasi 1812 sahifadan iborat.
Uchrashuv yakunida O‘zbekistonning qadimiy tarixi, urf-odatlari va madaniyatiga oid ilgari noma’lum qo‘lyozmalar va boshqa manbalarni aniqlashga bag‘ishlangan O‘zbekiston–Finlyandiya seminarini tashkil etish, shuningdek, qator tematik materiallarni nashr yetish bo‘yicha hamkorlik qilishga kelishib olindi.
Izoh (0)