2022-yilning aprel oyida yoshlar o‘rtasida futbol va mini-futbol bo‘yicha uch bosqichli DXX kubogi musobaqalariga start berilgan edi. Respublika bo‘yicha qariyb 242 ming nafar yoshlarni qamrab olgan musobaqalarning final bosqichi o‘yinlari 22-27-avgust kunlari Toshkent shahrida bo‘lib o‘tdi.
Unda mini-futbol bo‘yicha g‘oliblik Andijon viloyati Baliqchi tumanidagi “Ko‘l” MFY yoshlari jamoasiga nasib etgan bo‘lsa, Toshkent shahrining Olmazor tumani “Paxta” MFY jamoasi ikkinchi, Farg‘ona viloyati Farg‘ona tumani “Oqtepa” MFY jamoasi esa uchinchi o‘rinni egalladi. Navoiy viloyati Xatirchi tumani “Jaloir” MFY jamoasi yarim finalga qadar muvaffaqiyatli o‘yin namoyish etib, kuchli to‘rtlikni yakunlab berdi.
Futbol bo‘yicha o‘tkazilgan bellashuvlarda esa Toshkent viloyatining Bo‘ka tumani “Do‘stlik” MFY birinchi, Sirdaryo viloyati Mirzaobod tumani “Bog‘iston” MFY jamoasi ikkinchi o‘rinni egalladi. Uchinchi va to‘rtinchi o‘rinlar Jizzax viloyati Jizzax shahar “Turon” MFY hamda Andijon viloyati Andijon tumani “Poloson” MFY yoshlari jamoalariga nasib etdi. Final o‘yinida “Do‘stlik” jamoasi “Bog‘iston” jamoasini 3:1 hisobida mag‘lub qildi.
Musobaqalar yakuniga ko‘ra mini-futbol bo‘yicha:
“Eng yaxshi o‘yinchi” Shahboz Quvondiqov
“Eng yaxshi to‘purar” Bahrombek Xudayorov
“Eng yaxshi darvozabon” Madaliyev Odiljon munosib ko‘rildi.
Shuningdek, futbol bo‘yicha:
“Eng yaxshi o‘yinchi” Ahror Xo‘jabekov
“Eng yaxshi to‘purar” Asadbek Ahmadjonov
“Eng yaxshi darvozabon” Siroj Normurodov munosib ko‘rildi.
Endilikda futbol va mini-futbol bo‘yicha birinchi o‘rinni egallagan jamoalarga ular istiqomat qiladigan mahallada mini-futbol maydonchasi, ikkinchi o‘rin sohiblariga universal sport maydoni (basketbol va voleybol o‘yinlari uchun mo‘ljallangan), uchinchi va to‘rtinchi o‘rinlarni egallagan jamoalar mahallasiga esa “Stritbol” (bir savatli ko‘cha basketboli) sport maydonlari qurib beriladi.
Respublika bosqichida g‘olib va sovrindor bo‘lgan jamoalarning (1, 2, 3 va 4-o‘rinlar) O‘zbekiston Yoshlar ishlari agentligi ko‘magida bir hafta mobaynida Toshkent viloyati Bo‘stonliq tumanidagi O‘zbekiston Yoshlar ittifoqi markaziy kengashi ta’sischiligidagi “Shafran” tog‘-kurort kompleksida dam olishlari tashkil etiladi.
Bundan tashqari, DXX kubogining viloyat bosqichida g‘oliblikni qo‘lga kiritgan 28 ta jamoa vakillari istiqomat qiladigan mahallalarda “Workout” maydonchalari barpo etiladi.
Izoh (0)