Ижтимоий тармоқларда «Навоийазотдан чиқаётган тутунларнинг кучайганлик эҳтимоли юқори. Навоий халқининг соғлиғи учун қайғуриб, чиқаётган тутунни текширадиган ҳеч ким йўқми?» сарлавҳаси остида хабар тарқалди. Вилоят экология бошқармаси ҳолат юзасидан ўрганиш ишларини олиб борди.
Таъкидланишича, хабар юзасидан 26 август куни соат 23:10 да Навоий шаҳри экология бўлими давлат инспекторлари ҳамда Атроф-муҳит ифлосланишини мониторинг қилиш бўлимлари ходимлари томонидан «Навоийазот» АЖда ҳамда «Навоий Миллинг» МЧЖ корхоналарининг атрофидан «Газанализатор» ЭКОЛАБ ускуналар орқали (визуал) атмосфера ҳавосидан намуналар олиниб ўрганилди.
Биринчидан, «Навоийазот» АЖнинг синов учун ўрнатилган суперфосфат ишлаб чиқариш цехи «Табиатни муҳофаза қилиш тўғрисида»ги қонун ва қонуности ҳужжатлари талабларига жавоб бермагани, аҳолининг ҳақли эътирозига сабаб бўлгани учун завод томонидан фаолияти тўхтатилгани аниқланди.
Шунингдек, «Навоийазот»АЖнинг ишлаб чиқариш цехларидан чиқаётган зарарли газлар янги технологиялар жорий қилингани натижасида кейинги икки йилда олдингига нисбатан сезиларли камайгани, корхона вилоят экология бошқармаси кўрсатмаларига асосан атмосфера ҳавосига ташланаётган зарарли газларни камайтириш юзасидан чора-тадбирлар босқичма-босқич бажарилаётгани маълум бўлди.
Иккинчидан, ўрганиш давомида «Навоий Миллинг» МЧЖ корхонасидан атроф-муҳитга меъёридан юқори ифлослантирувчи моддалар ташлаётгани аниқланиб, 26 августдан 27 августга ўтар кечаси корхонанинг юқори ишлаш ҳажми концентрацияси пасайтирилиб, атмосфера ҳавосига ташланаётган ташламалар бўйича ҳолат бартараф этилди. Вилоят экология бошқармаси «Навоий Миллинг» МЧЖ корхонасида «Табиатни муҳофаза қилиш тўғрисида»ги қонун ва қонуности ҳужжатларнинг бажарилиши бўйича тегишли органнинг рухсатига асосан текшириш ўтказишини маълум қилди.
Изоҳ (0)