Davlat ekologiya qo‘mitasi qo‘mita raisi jiyani rahbarlik lavozimiga tayinlangani haqidagi xabarlarga munosabat bildirdi

Ijtimoiy tarmoqlarda Davlat ekologiya qo‘mitasi raisi Narzullo Oblomurodovning jiyani Toshkent shahar davlat ekologik ekspertiza markazi filialiga boshliq bo‘lgani haqida xabarlar tarqaldi. Qo‘mita matbuot xizmati buni rad etdi.

Rasmiy xabarda aytilishicha, Davlat ekologik ekspertizasi markazi tizimida bir necha yillardan buyon faoliyat yuritib kelayotgan Shaxboz Mo‘minov Davlat ekologik ekspertizasi markazi bosh direktori buyrug‘iga asosan Davlat ekologik ekspertizasi markazining Toshkent shahar filiali direktori lavozimiga munosib nomzod topilgunga qadar direktor vazifasini vaqtincha bajaruvchi etib tayinlangan.

“Ushbu xodimning qo‘mita raisiga qarindoshlik aloqasi haqidagi vajlar haqiqatga to‘g‘ri kelmasligini ma’lum qilamiz”, — deyiladi xabarda.

Qo‘mita, shuningdek, shaxsning qadr-qimmati kamsitilishi yoki uning obro‘sizlantirilishiga olib keladigan yolg‘on, asoslanmagan axborot tarqatganlik uchun qonunchilikda tegishli javobgarlik normalari belgilanganini eslatib o‘tgan.