Qoraqalpog‘istonda yana 672 ta yo‘rg‘a tuvaloq ochiq tabiatga qo‘yib yuborildi

Qoraqalpog‘istonda Davlat ekologiya qo‘mitasi va Falcon hunting solutions kompaniyasi tomonidan O‘zbekiston Qizil kitobi hamda xalqaro Qizil kitobga kiritilgan va yo‘qolib ketish xavfi ostida turgan noyob qush yo‘rg‘a tuvaloqlardan yana 672 tasi Ustyurt tekisligi hududiga qo‘yib yuborildi.

Qo‘mita matbuot xizmati ma’lumotlariga ko‘ra, Yo‘rg‘a tuvaloq O‘zbekistonda asosan Qizilqum cho‘lida, O‘zbekistondan tashqarida Qozog‘iston, Turkmaniston, Tojikiston, Kavkaz orti, Misr, G‘arbiy Osiyo, Mo‘g‘ulistonda uyalaydi.

Cho‘llarga bahorga yaqin uchib keladi. Har biri 2, 3 donadan tuxum qo‘yadi va 21, 25 kun davomida bosib yotadi. Polaponlari iyun-iyul oylarida ucha boshlaydi.

Ayni paytda O‘zbekistonda bu noyob qushlarni maxsus pitomniklarda ko‘paytirib, tabiat bag‘riga qo‘yib yuborish ishlari yo‘lga qo‘yilgan.

Eslatib o‘tamiz, aprel oyida 504 ta, iyunda esa 402 ta yo‘rg‘a tuvaloq Ustyurt tekisligiga qo‘yib yuborilgandi.