ДХХнинг Сирдарё вилояти бўйича бошқармаси томонидан ҳудудий божхона бошқармаси ходимлари билан ҳамкорликда кучли таъсир қилувчи дори воситаларининг Қирғизистон–—Фарғона водийси —Тошкент —Сирдарё йўналишида ноқонуний айланмасига қарши курашиш доирасида бир нечта фаол тадбирлар амалга оширилди, деб хабар бермоқда ЎзА.
Жумладан, Фарғона туманида яшовчи, 1975 йилда туғилган фуқаро бошқарувидаги Damas Тошкентнинг Яшнобод тумани ҳудудида тўхтатилиб, кўздан кечирилганда, Қирғизистондан олиб кирилган ва кейинчалик Тошкент орқали Сирдарё вилояти ҳудудига олиб бориш режалаштирилган 4 200 дона «Регапен» ва 1000 дона «Тропикамид» кучли таъсир қилувчи дори воситалари борлиги аниқланиб, процессуал тартибда расмийлаштириб олинган.
Шунингдек, Фарғона—Тошкент йўналишида ҳаракатланиб келаётган Тошкент шаҳрида яшовчи, 1986 йилда туғилган шахс бошқарувидаги Nexia-2 пойтахтдаги «Шарқ» ЙПХ масканида тўхтатилиб, кўздан кечирилган. Текширув натижасида автомашина юкхонасидаги метан газ балони ичига хуфиёна тарзда яширилган 999 дона «Тропикамид» ва 3356 дона «Регапен» номли кучли таъсир этувчи дори воситалари борлиги аниқланиб, процессуал тартибда расмийлаштириб олинган.
Бундан ташқари, Фарғона вилоятида яшовчи, 1987 йилда туғилган шахс Тошкент вилояти Ўртасарой тумани ҳудудида қўлга олиниб, унинг юк сумкаси кўздан кечирилганда, унда 900 дона «Тропикамид» ва 1680 дона «Регапен» кучли таъсир қилувчи дори воситалари борлиги аниқланган.
Тошкент шаҳрида ўтказилган тезкор тадбирда эса «Бектемир» йўл-патруль хизмати маскани ҳудудида Lacetti текширилганда, йўловчи сифатида кетаётган шахсга тегишли полиэтилин пакетда 504 дона «Регапен», 91 дона «Тропикамид» дори воситалари борлиги аниқланган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)