Kobulda masjid portladi, kamida 20 kishi halok bo‘ldi

17-avgust kuni Afg‘oniston poytaxti Kobul shimoli-sharqidagi masjidda yuz bergan portlash oqibatida kamida 20 kishi halok bo‘lib, 40 ga yaqin odam jarohatlar oldi, deb yozadi Asia Plus. “Tolibon” hodisa yuzasidan izoh berganicha yo‘q. Hech qaysi guruh hozircha voqea uchun javobgarlikni zimmasiga olmadi.

Kuchli portlash Kobul masjidida kechki payt namoz chog‘ida sodir bo‘lgan. Xavfsizlik xizmati xodimi Al Jazeera nashriga ma’lum qilishicha, portlash oqibatida 20 kishi halok bo‘lib, 40 kishi jarohatlangan.

Reuters ma’lumotlariga ko‘ra, portlash Kobulning shimoliy qismida yuz bergan. Toliblar razvedkasi vakili anonim tarzda nashrga ma’lum qilishicha, hodisa Xayra Xana tumanidagi masjidda sodir bo‘lgan.

Reuters manbasi qo‘shimcha qilishicha, halok bo‘lganlar orasida masjidga rahbarlik qilgan imom ham bor.

Associated Press xabariga ko‘ra, Siddiqiya masjididagi portlashni xudkush terrorchi amalga oshirgan.

Italiyaning Emergency nohukumat tashkiloti 27 kishi jarohat olgani, shularning uch nafari vafot etganini ma’lum qildi.