Bloomberg: Energetika inqirozidan sanoat tarmoqlari eng ko‘p aziyat chekmoqda

Energetika inqirozi kuchayib borar ekan, jahon iqtisodiyotining asosini tashkil etuvchi birlamchi sanoat tarmoqlariga bosim ham tobora ortib bormoqda. Bu haqda Bloomberg agentligiga tayanib, “TASS” xabar berdi.

Agentlikning ma’lum qilishicha, sanoat metallari, po‘lat, o‘g‘it va shakar ishlab chiqarish bilan shug‘ullanuvchi energiyani ko‘p talab qiladigan tarmoq vakillari zavodlarni yopishga majbur bo‘lmoqda.

Vaziyat vaqt o‘tishi bilan yanada og‘irlashishi mumkin, chunki qishda gaz tanqisligi yanada sezilarli bo‘ladi.

Bu o‘n yilliklar ichida yashash narxining eng yomon holatiga kelib qolgan uy xo‘jaliklariga ta’sir qilishi va iqtisodiyotni retsessiyaga olib kelishi mumkin.

Bloomberg ta’kidlashicha, o‘tgan yil davomida Yevropa o‘zining rux va alyuminiy eritish quvvatining yarmini yo‘qotgan.

Norvegiyaning eng yirik alyuminiy mahsulotlari ishlab chiqaruvchisi Norsk Hydro allaqachon sentabr oyi oxirida Slovakiyadagi alyuminiy eritish zavodini elektr energiyasi narxi oshishi sababli yopishni rejalashtirayotganini ma’lum qilgan.

Belgiyaning Nystar kompaniyasi Niderlandiyadagi rux zavodini yopayotganini e’lon qildi.

Amerikaning eng yirik alyuminiy ishlab chiqaruvchisi Century Aluminium shu yil boshida Kentukkidagi zavodini vaqtincha yopishga majbur bo‘ldi.

Zavodlar yopilishiga yuqori energiya narxlari sabab bo‘lmoqda va buning ortidan korxonalar o‘z-o‘zini qoplay olmayapti.

Bundan tashqari, AQSHning kamida ikkita po‘lat zavodi ishlab chiqarishni cheklashni boshladi va Buyuk Britaniyadagi British Steyel zavodi o‘z narxlarini oshirdi.

O‘g‘it ishlab chiqarish uchun Yevropaga ham gaz kerak. Yevropa davlatlari allaqachon azotli o‘g‘itlar ishlab chiqarish quvvatlarining kamida to‘rtdan bir qismini yo‘qotgan.

Xalqaro o‘g‘itlar assotsiatsiyasi 2008-yildan beri o‘g‘it iste’molining eng jiddiy qisqarishini kutmoqda.

Energiya inqirozi shakar ishlab chiqarishga ham salbiy ta’sir ko‘rsatadi. Germaniyaning Suyedzucker shakar korporatsiyasi Rossiyadan gaz yetkazib berish to‘xtatilsa, boshqa energiya manbalariga o‘tishi mumkinligi haqida ogohlantirgan bo‘lsa-da, tahlilchilarning fikricha, bu kelajakda shakar narxining yanada oshishiga olib keladi.