Farg‘ona viloyatining Marg‘ilon shahrida soxta DXX xodimi qo‘lga olindi. Bu haqda O‘zA xabar berdi.
Ma’lum qilinishicha, u viloyatdagi tumanlardan birining xalq ta’limi bo‘limi mudiri U.R. dan tovlamachilik yo‘li bilan pul olayotganida ushlangan.
Shahardagi umumiy o‘rta ta’lim maktablaridan birining direktor o‘rinbosari bo‘lgan T.I. o‘zini tuman xalq ta’limi bo‘limi mudiri U.R.ga DXX viloyat boshqarmasi mas’ul xodimi sifatida tanishtirib, uning ustidan ariza tushganini ma’lum qilgan.
Bo‘lim mudiri har oyda maktab direktorlaridan pul talab qilib kelayotganini, yaqinda yuqori lavozimga qo‘yilgan ayoldan katta miqdorda pora olganini isbotlovchi audio va video yozuvlar borligini aytib, uni javobgarlikdan qutqarib qolish evaziga 15 million so‘m talab qilgan.
DXX Farg‘ona viloyati boshqarmasi va Iqtisodiy jinoyatlarga qarshi kurashish departamenti viloyat boshqarmasi xodimlari bilan o‘tkazilgan tadbirda T.I. ko‘rsatib o‘tilgan miqdordagi pulni olayotgan vaqtida daliliy ashyo bilan qo‘lga olingan.
Qayd etilishicha, holat yuzasidan T.I.ga nisbatan Jinoyat kodeksining 165-moddasi (tovlamachilik) 1-qismi bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)