Surxondaryoda o‘zini DXX xodimi deb tanishtirib, fuqaroga Tashkent City’dan uy va mashina olib berish uchun 1100 dollar olgan shaxs ushlandi

Surxondaryo viloyati Sariosiyo tumanida fuqaroga uy, mashina olib berishni va’da qilgan soxta DXX xodimi ushlandi. Bu haqda viloyat Ichki ishlar boshqarmasi xabar qildi.

Qayd etilishicha, fuqaro G‘.M. Boysun tumani “Ko‘chkok” mahallasida yashovchi F.R.ga o‘zini Davlat xavfsizligi xizmatida ishlashini va tanishlari orqali Toshkent shahridagi Tashkent City dahasida qurilayotgan ko‘p qavatli uylardan birini olib berishini aytgan. Buning uchun u F.R.dan 22-fevral kuni 700 dollar olgan. Hech qancha vaqt o‘tmay, G‘.M. mashina ham olib berishini aytib, 7-mart kuni 400 dollar olgan.

Pullar ham, uy va mashinadan ham darak bo‘lavermagach, F.R. viloyat IIBga ariza bilan murojaat qilgan. U G‘.M. hozirgi kunga qadar ushbu pullarni qaytarib bermayotganini, uyni nomiga rasmiylashtirib berish uchun esa yana 1500 dollar miqdorida pul berishini so‘rayotganini bildirgan. Fuqaro unga nisbatan qonuniy chora ko‘rishni va yetkazilgan zararni undirib berishni so‘ragan.

Mazkur arizaga asosan, 31-mart kuni Surxondaryo viloyati IIB JQB Korrupsiya va iqtisodiy jinoyatlarga qarshi kurashish bo‘limi hamda DXX Surxondaryo viloyati bo‘yicha boshqarmasi xodimlari bilan hamkorlikda tezkor tadbir o‘tkazilgan. Tadbir davomida soat 23:30 larda fuqaro G‘.M. Sariosiyo tumani “Registon” oshxonasida ariza muallifi F.R.dan talab qilingan 1500 dollar miqdoridagi kimyoviy ishlov berilgan pullarni sanab olgan vaqtida qo‘lga olingan.

Holat yuzasidan G‘.M.ga nisbatan Jinoyat kodeksining 168-moddasi 3-qismi “b” bandi (takroran yoki xavfli retsidivist tomonidan firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.